जब महिला एएसपी  बुलडोजर के स्टेयरिंग संभालिस त …….

बिलासपुर। ग्रामीन थाना मन के मालखाना म लंबा अरसा ले पड़े जब्ती के पांच हजार 500 लीटर सराब ल नस्ट करे गिस हे। ए दउरान महुआ सराब  ल घलो मिट्टी म उढ़ेल देय गिस। एती सराब ले भरे बोतल मन ल बुलडोजर चलाके नस्टीकरन करे गिस।

कार्रवाई के दउरान महिला एएसपी खुद बुलडोजर के स्टेयरिंग म बइठ गिस। एसपी आरिफ एच. शेख ह विसेस पहल करत हुए स्वच्छ भारत मिसन के तहत थाना मन के मालखाना म सफाई अभियान चलाए हे। पहिली सबो थाना मन के मालखाना के जानकारी जुटाइस। एमा पता चलिस के मालखाना ह जब्ती के सराब क बोतल अउ जेरीकेन ले भरे हवय।  उहें  बिसरा अउ कार्टून घलो भरे पड़े हे।  ए दउरान ए बात घलो आघू आइस के थाना म  लंबा अरसा ले  नकदी रकम के संग ही जेवर वगेरह घलो बेकार पड़े हे।

एएसपी अर्चना झा ह बताइस के ए अभियान म सामिल सबो थाना प्रभारी अउ मालखाना मददगार ल एसपी नकद रासि देके पुरस्कृत करही।  एखर बर उमन ह पहिली ले घोसना करे हे।  उमन बताइस के अगली कड़ी म अब जल्द ही गौरेला अनुविभाग के अंतरगत आवइया थाना म जब्त सराब के नस्टीकरन कर जाही।