जलकी जमीन विवाद के मामला हाई कोरट पहुंचिस….

बिलासपुर। महासमुंद म जलकी जमीन विवाद के मामला हाईकोरट पहुंच गे हे। शुक्रवार के ये मामला म रायपुर के पूर्व महापौर किरणमयी नायक ह कृषि मंत्री बृजमोहन अग्रवाल के खिलाफ हाईकोरट म याचिका दायर करे हे। उमन जमीन मामला म अवैध कब्जा के जांच के मांग करिस हे। कोरट ह एडवोकेट जनरल ल रिपोट पेश करे बर कहे हे। अगला सुनवाई दू हफ्ता बाद होही। बतादन कि महासमुंद के जलकी म कृषि मंत्री बृजमोहन अग्रवाल के पत्नी सरिता अग्रवाल, बेटा मन अउ नौकर मन के नाम म ले गे जमीन म बने 177 एकड़ के फार्म हाउस ल लेके एक अउ चौंकाने वाला मामला आगू आए रहिस हे । कैग ह बरस 2013 म वन विभाग ले बरस 2003-04 म लगाए गे 16 लाख के पौध मन के जानकारी मांगे रहिस हे। तब वन विभाग ह कैग ल बताइस कि जे जमीन म पौधा लगाए गे हे , वो हा सरिता अग्रवाल के नाम के फार्म हाउस म चले गेहे। विभाग ह बताइस कि ओला ये 4.124 हेक्टेयर जमीन जलकी निवासी विष्णु उर्फ श्यामलाल और चार अन्य मन ह दान म दे रहिस हे अउ अब वो हा मंत्री के पत्नी के नाम म रजिस्ट्री करे जा चुके हे। ये मामला म सरकार घलो जांच करिस हे अउ मंत्री बृजमोहन अग्रवाल ल क्लीन चिट दे दीस हे।