जिला के 300 मेडिकल स्टोर्स बंद रहिन

रायगढ़। देसव्यापी मेडिकल स्टोर्स एसोसिएशन बंद के असर रायगढ़ म घलो देखे बर मिलिस। जिला म ये बंद के आह्वान ऊपर लगभग300 मेडिकल स्टोर्स बंद रहिन। मेडिकल स्टोर संचालक मन के मानना हे कि बिना डॉक्टर के प्रिसक्रिप्सन के ही आन लाइन दवाई के बिकरी करे जात हे। जेखर चलत ग्राहक मन के संख्या घट गिस हे, अऊ दुकानदार मन ल नुकसान सहना पड़त हे। मेडिकल स्टोर संचालक मन के कहिना हे कि आन लाइन दवाई बर सरकार के डहार ले कउनो नियम नइ बनाय गेहे हे। हड़ताल के बेरा सिरिफ मेडिकल कालेज अस्पताल म मउजूद रेडक्रॉस के दुकान खुले रहिस, बाकी दुकान बंद रहिस हे, जेखर चलत मरीज मन दवाई बर भटकत नजर आइन।