ट्रक अउ बाइक के आपस म भिडंत …. बाइक चालक के मउत

इलाज के दउरान एक ह तोड़िस दम, त दूसर ल करे गिस रेफर

बालोद । नगर सहित ग्रामीन अंचल के सड़क म आए दिन मोटर सायकिल, बस अउ ट्रक के टक्कर ले हादसा घटित होवत हे। जेमा कोनो न कोनो व्यक्ति ल अपन जान गवांए बर पड़त हे। ठीक अइसे ही घटना जिला मुख्यालय स्थित पुलिस थाना अउ कॉलेज के  आघू  होइस हे।

मिले जानकारी  म मंगलवार के ग्राम अरमरीकला निवासी रुद्रेश कुमार उम्र 20 वर्ष व नारायण 20 वर्ष दूनों युवक  ह मोटर सायकल क्रमांक सीजी 24-5174 म सवार होकर जिला रोजगार कार्यालय म पंजीयन करए बर आए रहिन हे।

पंजीयन कराए के बाद दूनों युवक मन ह नवां बरस म तांदुला जलाशय घूमे बर निकल गे। जलाशय ले  घूम के अपन घर अरमरीकला जात रहिन हे तभे दुर्ग ले दल्लीराजहरा के ओर जात ट्रक क्रमांक सीजी 19 बीएफ 5054 ह पुलिस थाना व कॉलेज के आघू  मोटर सायकिल ल ठोकर मार दीस। जेखर ले मोटर सायकिल म सवार दूनों युवक मन ल काफी चोट आइस हे।

हास्पिटल म इलाज के दउरान तोड़िस दम

घटना स्थल म मउजूद राहगीर मन ह  घायल  अउ  खून ले लथपथ- तड़फत देख आनन फानन म समीपस्थ जिला अस्पताल म भरती कराइन। जिहां इलाज के दउरान ही एक के मउत हो गिस।  उहें एक घायल युवक के स्थिति गम्भीर बने हुए हे, जेखर बेहतर इलाज बर  बाहिर रेफर करे गिस।

ट्रक चालक ह  करिस समरपन

हादसा घटित व घायल युवक के तीर रोड म चलिया  राहगीर मन के  भीड़ ल बढ़त देख ट्रक ड्राइवर ह समीपस्थ पुलिस थाना म  पहुँच के आत्मसमरपन कर दिस।  ताकि कोनो भी व्यक्ति ट्रक  अउ स्वयं ड्राइवर ल कोनो भी प्रकार ले नुकसान नइ पहुंचा सकय।