तीन झन काटत रहिन जंगल, तुमगांव टीम ह जब्त करिन गाड़ी-बइला अउ लकड़ी

महासमुंद। तुमगांव वन परिक्षेत्र म जंगल के कटाई करत तीन झन ल वन विभाग ह पकड़े हे।  बता दन के कुकराडीह कक्ष क्रमांक 15 म ग्राम जोबा के तीन झन गाड़ी-बइला लेके पहुंचिन। अउ इहां  के हरे-भरे पेड़ ल काट के बइल गाड़ी म भरले रहिन हे। त कुकराडीह के वन प्रबंधन ह सक्रिय भूमिका निभात हुए  एखर सूचना वन विभाग ल दीस। जेखर  बाद विभाग के टीम ह जंगल म दबिश देवत हुए देवनारायण पिता जयलाल (45), अशोक पिता गज्जु ठाकुर (52), श्यामलु पिता चमरा यादव (48) के तीर ले तीन बइल-गाड़ी म लकड़ी जब्त करिस।  तीन झन प्राथमिक पूछताछ म जलाउ  बर  ले जाना बताइस। बताए जात हे के तीन के तीर ले करीब 2 चट्‌टा लकड़ी समेत  बइल-गाड़ी  ल जब्त करे गेहे।  तीनों आरोपी के खेलाफ वन अधिनियम  म कार्रवाई करे जाही।

डेढ़ माह पहिली बनिस सहायक परिक्षेत्र

तुमगांव क्षेत्र के एक बड़ भू-भाग म जंगल हे, लेकिन दूसर परिक्षेत्र म सामिल होय के सेती इहां के जंगल ल बेदर्दी ले काटे जात रहिस हे।  डेढ़ महीनी पहिली  ही तुमगांव क्षेत्र ल नवां सर्किल बनाय गेहे।  तब ले इहां लगातार निगरानी रखे जात हे।  तुमगांव क्षेत्र के सहायक परिक्षेत्र अधिकारी ज्ञानचंद कश्यप  ह बताइस के वन मंडलाधिकारी आलोक तिवारी के मार्गदर्शन म ए कार्रवाई होइस हे ।  ए कार्रवाई म वन प्रबंधन समिति के अलावा आकाश, रूपा चतुर्वेदी, पंकज वर्मा, हीरामन साहू, लालाराम के सराहनीय सहयोग रहिस।