जांजगीर-चाम्पा। जिला के तौलीपाली गांव म मिड-डे-मील खाए ले 17 लइका मन बीमार हो गिस। फूड प्वाइजनिंग के बाद छात्र मन ल उल्टी होए बर लगिस, जेकर बाद 12 लइका मन ल सक्ती अस्पताल अऊ 5 लइका मन ल खरसिया अस्पताल म भर्ती कराए गिस। जिहां जम्मो झन के इलाज चलत हे। जिला म एकर ले पहिली घलो मिड-डे-मील खाए ले लईका मन के बीमार होय के मामला आगु आ गे हे। ओकर बाद घलो बिभाग ह मामला ल गंभीरता ले नइ लेत हे।
अन्तर्राज्यीय मोबाइल चोरी करइया गिरोह के 2 सदस्य ल गिरफ्तार
रायपुर म पुलिस ह अन्तर्राज्यीय मोबाइल चोरी करइया गिरोह के 2 सदस्य ल गिरफ्तार करे हे। पुलिस ह बताइस कि गिरफ्तार होए दुन्नों आरोपी दुर्दांत मेवाती इलाका के रहइया हे। आप मन ल बता दन कि 11 फरवरी के अज्ञात चोर मन सहर के आउटर के 3 बड़े मोबाइल दुकान म सटर तोड़के चोरी के घटना ल अंजाम दे रिहिन। पुलिस ह बताइस कि आरोपी ये मोबाइल के IMEI नंबर बदलके डब्बा म पैक करके दिल्ली हरियाणा के दुकान मन म भेजत रिहिस हे।
महापौर दुबे ह 2 हजार 500 करोड़ रूपिया के बजट पेस करिस
रायपुर नगर निगम के बजट पेस करे गिस। महापौर प्रमोद दुबे ह लगभग 2 हजार 500 करोड़ रूपिया के बजट पेस करिस। बजट म महिला अऊ बाल विकास विभाग म 41 लाख के प्रावधान करे गिस हे। खेलकूद एवं युवा कल्याण बिभाग म 12 करोड 68 लाख प्रस्ताव करे गिस। एकर संग ही छत्तीसगढ़ी भाखा संगोस्ठी बर 10 लाख के प्रावधान करे गिस हे। उहें बजट पेस होय ले पहिली ही निगम के बइठक म बिपक्ष के जोरदार हंगामा देखे बर मिलिस। बिपक्ष के पार्सद मन नाराबाजी करत हुए आसंदी कना पहुंच गिन अऊ साफ पानी दे के मांग ल लेके हंगामा घलो करिन।
सर्व आदिवासी समाज के लोगन मन निकालिन रइली
मुंगेली के लोरमी नगर म सर्व आदिवासी समाज के लोगन मन SC-ST एक्ट म संसोधन के खिलाफ बिरोध प्रदर्सन करत रइली निकालिन। असल म सुप्रीम कोर्ट ह SC-ST एक्ट म संसोधन करत बदलाव करिस, जेकर बिरोध करत आदिवासी समाज के लोगन मन राज्य अऊ केन्द्र सरकार के खिलाफ जमके नारेबाजी करिन। उहें प्रदर्सनकारी मन संसोधन ल वापस ले के मांग करत हुए उग्र आंदोलन के चेतावनी घलो दिन हे।
माईनिंग बिभाग अऊ नगर निगम टकराव
कोरबा म रेत घाट संचालन ल लेके माईनिंग बिभाग अऊ नगर निगम म टकराव होवत हे । माईनिंग बिभाग के स्वीकृति के बाद घलो निगम सहर के 2 बड़े रेत घाट के संचालन ल लेके मंजूरी नइ देत हे। जेकर ले एक डहार रेत के कालाबाजारी धड़ल्ला ले चलत हे, उहें दूसर डहार रेत घाट के बंद होए ले एकर सीधा असर आम आदमी के जेब म पड़त हे। असल म सहर के सीतामढ़ी अऊ गेवरा रेत घाट के रायल्टी फरवरी महीना म ही खत्म हो गे रिहिस, जेला दोबारा माईनिंग बिभाग ह रिन्यू करके आगु एक बछर बर 9 मार्च के ही रेत घाट संचालन के आदेस जारी कर दे हे। फेर माईनिंग बिभाग के ये आदेस के बाद घलो नगर निगम के रेत घाट संचालन बर कर्मचारी मन के नियुक्ति करे के बजाय नियम कानून के जानकारी ले म जुटे हे।
