देश के लोकतंत्र ल सुरक्षित रखे म भारतीय संविधान के अड़बड़ बड़ भूमिका हे: डॉ. रमन सिंह

महान लोकतंत्र ल सुरक्षित रखे म हमार महान भारतीय संविधान के महत्वपूर्ण भूमिका: डॉ. रमन सिंह
रायपुर। मुख्यमंत्री डॉ. रमन सिंह ह आज 26 नवंबर के दिन संविधान दिवस के अवसर म जनता ल हार्दिक बधाई अऊ शुभकामना देहे हें। डॉ. सिंह ह संविधान दिवस के पूर्व संध्या म काली इहां जारी शुभकामना संदेश म कहे हें के देश के महान लोकतंत्र ल सुरक्षित रखे म हमार महान भारतीय संविधान के अड़बड़ बड़ भूमिका हे। उमन सबो मनखे मन ल संविधान के पवित्र भावना के मुताबिक कानून के मार्ग म चलके देश म शांति, सद्भाव अऊ सामाजिक समरसता के भावना ल अऊ जादा सुदृढ़ बनाए के अपील करे हें।
मुख्यमंत्री ह कहिन- संविधान म जिहां हरेक नागरिक ल समानता के अधिकार दे गए हे अऊ कई मौलिक अधिकार देहे गे हे, उन्‍हें ए अधिकार मन के संगें-संग कई असल कर्त्तव्य मन के घलोक उल्लेख करे गए हे। ए कर्त्तव्य मन म संविधान के पालन करना अऊ ओखर आदर्श अउ राष्ट्रध्वज अऊ राष्ट्रगान संग जम्‍मो संवैधानिक संस्था मन के आदर करना घलोक सामिल हे। डॉ. सिंह ह कहिन -हम सबला राष्ट्र अऊ समाज के व्यापक हित म संविधान प्रदत्त अधिकार मन के उपयोग करत ओमा बताए गए कर्त्तव्य मन के घलोक पालन करना चाही।
डॉ. रमन सिंह ह कहिन -महान स्वतंत्रता संग्राम सेनानी मन अऊ क्रांतिकारी मन के कठिन संघर्ष के बाद देश ल 15 अगस्त 1947 के दिन आजादी मिलीस अऊ भारत रत्न डॉ. राजेन्द्र प्रसाद जी के अध्यक्षता म संविधान सभा के अऊ भारत रत्न बाबा साहब डॉ. भीमराव अम्बेडकर के अध्यक्षता म संविधान प्रारूप समिति के गठन करे गीस। डॉ. अम्बेडकर ह कड़ा मेहनत ले संविधान के निर्माण करिस, जऊन ल उमन 26 नवंबर 1949 के दिन संविधान सभा के अध्यक्ष डॉ. राजेन्द्र प्रसाद ल सउंपिन। उही दिन संविधान सभा म हमार महान भारतीय संविधान ल अंगीकृत करे गीस।