धरमलाल कौशिक ल घलो चाही मुफ्त के सरकारी मोबाइल

रायपुर। बीजेपी के प्रदेस अध्यक्छ धरमलाल कौशिक ल घलो दूसर वकील के तरह मुफ्त म मिले वाले सरकारी मोबाइल चाही। जी हां ये सच हे, हाईकोरट बार एसोसिएसन अऊ बिलासपुर जिला अधिवक्ता संघ के जउन तीन हजार वकील मन ह मोबाइल बर आवेदन करिन हे, ओमा धरमलाल कौशिक के नाव घलो सामिल हे। असल म जिला अधिवक्ता संघ के मांग म मुख्यमंत्री रमन सिंह ह प्रदेस के वकील मन ल स्मार्ट फोन दे के घोसना करे रहिस हे। जेखर बाद मोबाइल बर पात्र वकील मन ल चिन्हित करे अऊ फार्म भरे के सिलसिला सुरु हो गिस हे। फार्म भरे बर बकायदा चिप्स के अफसर मन ह जिला कोर्ट परिसर म सिविर घलो लगाए रहिस। ये बेरा बिलासपुर जिला अधिवक्ता संघ के आजीवन सदस्य अऊ प्रदेस भाजपा अध्यक्छ धरमलाल कौशिक के डहार ले फार्म जमा कराए गिस।