नवां सरकार म बदलाव के दउर जारी…. अध्यक्ष, उपाध्यक्ष, संचालक अउ सदस्य मन के मनोनयन ल तत्काल प्रभाव ले निरस्त

रायपुर। छत्तीसगढ़ म नवां सरकार बने के बाद बदलाव के दउर जारी हवय।  प्रसासनिक सर्जरी के साथ ही कई महत्वपूर्ण बदलाव करे जात हे। इही क्रम म गुरुवार के सरकार ह प्रदेस के सबो आयोग, निगम, मंडल, प्राधिकरण, समिति, परिषद अउ अन्य संस्था मन म पदस्थ अध्यक्ष, उपाध्यक्ष, संचालक अउ सदस्य मन के मनोनयन ल तत्काल प्रभाव ले निरस्त कर देय गेहे।

छत्तीसगढ़ सासन के सामान्य प्रसासन विभाग मंत्रालय, अटल नगर के ओर ले  जारी आदेस के मुताबिक संबंधित प्रसासकीय विभाग के भारसाधक सचिव ल संबंधित संस्था के अध्यक्ष या यथास्थिति अन्य पदनाम के दायित्व सउपे गेहे। उहें मुख्य सचिव अजय सिंह ह राज्यपाल के नाम ले उक्त आदेस जारी कर हे।