निगम के ए कार्यवाही ले सब्जी बेचइया मन करिन शास्त्री बाजार म चक्काजाम

रायपुर। रायपुर नगर निगम के अधिकारी मन के अवैध वसूली ले परेसान होके शुक्रवार के बिहनिया सब्जी व्यापारी मन ह शास्त्री मार्केट म आंदोलन करत चक्का जाम करिन अउ बाजार बंद करे के आह्वान करिन। एखर ले  जनता  ल ताजा सब्जी नइ  मिलिस अउ परेसान होना पड़ीस।  

बता दन के रायपुर नगर निगम के शास्त्री मार्केट हमेसा ले   विवाद  रहे हे  अउ आज इहीं विवाद के चलत सब्जी व्यापारी अउ निगम अधिकारी के बीच विवाद होगे। व्यापारी मन के  आरोप हे के नगर निगम के अधिकारी मन ह  सब्जी अवैध वसूली करिन अउ सब्जी जब्त कर चबूतरा तोड़े के काम करिन। एखर ले सब्जी व्यापारी मन ह  सुबह ले आंदोलन करिन अउ चक्का जाम कर शास्त्री मार्केट ल घेर लिन। सब्जी व्यापारी मन के कहिना हे के  नगर निगम के अधिकारी आज सफाई के बहाना कर के व्यापारीमन ले  अवैध वसूली कर पांच सौ ले एक हजार रुपए चालान काटे हे। उहें व्यापारी मन के सब्जी ल जब्त कर लीन। व्यापारी आघू कहिन के नगर निगम के कर्मचारी सफाई सुबह करे के बजाय 10 बजे के बाद करथे।  जबकि ए बेरा ह  मार्केट होथे। जेखर ले कारोबार करे म परेसानी होथे।

एती ए मामला म जोन क्रमांक -4 के आयुक्त आरके डोंगरे के कहिना हे के गलत  तरीका ले  बाजार म सब्जी बेचइया मन उपर  कार्रवाई करे गिस। उहें साफ सफाई ल लेकरे इहां काफी परेसानी होत हे। सब्जी व्यापारी हमें को-ऑपरेट नइ करत। ए वजह ले चालानी कार्रवाई करे पड़ीस।