नियमितीकरन के आस : लखमा ह दैनिक वेतनभोगी भृत्य ल बुलाइस राजधानी

जगदलपुर। कई साल ले दैनिक वेतनभोगी कर्मचारी भृत्य के नउकरी करत हवय।  जे मन ल 8 हजार रूपिया  मासिक वेतन मिलत हे। अधिकारी मन ह  षड़यंत्रपूर्वक अपन लोगन ल  रेगुलर कर दिस। लेकिन 180 अइसे कर्मचारी हे जे मन ल नियम म उलझाके कभु नियमित नइ होए के पेंच म फंसा देय गेहे।  उद्योग अउ आबकारी मंत्री कवासी लखमा ले सर्किट हाऊस म मिले पहुंचे ए चतुर्थ वर्ग कर्मचारी मन ह अपन आपबीती बतात ए बात कहिन।

उमन कहिन के  कतको  लोगन ह नउकरी छोड़के चले गिस। डेमा ले करीबन 90 लोग अभी भी नियमित होय के उम्मीद म काम करत हवय। मंत्री कवासी लखमा ह इमन ले कहिन के आप मन ह रायपुर आ जाहू त ट्रायबल मंत्री ले मुलाकात करवा दूंहूं।  सायद कोनो रास्ता निकल जाही।  कर्मचारी मन ह अधिकारी मन के मनमानी अउ नियमितिकरन म करेगे घपलेबाजी के बात घलो कहिन। जेखर पूरा दस्तावेज होए के बात इमन कहिन।