निर्वाचन कार्य म लापरवाही.. तहसीलदार ध्रुव उपर गिरीस गाज

रायपुर – धमतरी। धमतरी के तहसीलदार राकेश ध्रुव ल मतगनना स्थल के स्ट्रांग रूम म अनाधिकृत व्यक्ती मन के संग प्रवेस करे के मामला म मुख्य निर्वाचन पदाधिकारी के निरदस  म तत्काल प्रभाव ले निलंबित कर देय गिस हे। उमन ल प्रकरण म निर्वाचन निरदेस मन के उलंघ्घन करे जाय के सेती ले निलंबित करे गिस हे । निलंबन अवधि म ध्रुव ल मुख्यालय कलेक्टोरेट कार्यालय रायपुर म नियत करे गिस हे।

दरअसल धमतरी म मंगलवार के पार्टी प्रत्याशी मन के कार्यकता मन ल  सूचना देय  बगैर तहसीलदार राकेश ध्रुव अपन दो पटवारी अउ  दू इलेक्ट्रिशियन समेत  स्ट्रांग रूम के अंदर घुस गिस  । तहसीलदार  बिहनिया  11 बजे स्ट्रांग रूम म घुसिस अउ 3 घंटा तक  म रहिस हे। एखर सेती  ओ बेरा म स्ट्रांग रूम के बाहिर  के माहउल गरमा गिस । सवाल  उठे लगिस के जब चुनाव के पहिली  पूरा प्लानिंग कर लेय गिस त  सीसी टीवी कइमरा पहिली ले स्ट्रांग रूम के अंदर काबर वइ लगाय गिस।

उहें बार बार उंखर मवजूदगी  ल लेके स्ट्रांग रूम के बाहिर  बइठे कांग्रेस अउ निरदलीय प्रत्याशी मन के समरथक मन ह आपत्ति करिन । एखर बाद भी उमन ह  विश्वास म लेए बगैर 3 घंटा तक तहसीलदार अंदर म ही डटे रहिस हे । इधर खबर पाके कांग्रेस के जिलाध्यक्ष मोहन लालवानी, जिला निर्वाचन अधिकारी सी आर प्रसन्ना अउ एसपी रजनेश सिंह समेत अन्य अधिकारी घलोक  मउवका म  पहुंच गिस। उप जिला निर्वाचन अधिकारी सुनील शर्मा  के कहिना रहिस के कलेक्टर के निरदेस म इ हां सीसीटीवी कैमरा लगाय जात हे। जेखर वायरिंग के काम करे जात रहिस हे  अउ एखर बर स्ट्रांग रूम के परिसर  म जाए बर तहसीलदार समेत दू इलेक्ट्रिशियन ल जाय के परमिशन देय गिस हे। कुल 3 लोगन के  अंदर जाय के  अनुमति देय गेहे।  जबकि इहां कुल 5 लोगन अंदर घुसे रहिस हे।                                  विधायक गुरमुख सिंह होरा, आनंद पवार अउ दिग्विजय सिंह ह जिला निर्वाचन अधिकारी के कार्य म सवाल उठात हुए  एएला गंभीर त्रुटि कहिन हे । एखर संग  राज्य निर्वाचन आयोग ल  ए पूरा मामला के निष्पक्ष जांच कर दोषी तत्व मन उपर कार्रवाई के मांग  कांग्रेस ह करे रहिस हे।