जशपुर। लोक सुराज अभियान के तृतीय चरण म आज सीएम डॉ. रमन सिंह जशपुर जिला के ग्राम खरकट्टा पंचायत भवन पहुंचिस। ये दउरान सीएम ल जब यह पता चलिस कि पत्थलगांव क्षेत्र के 26 हजार घर मन म अभी तक ले बिजली नइ पहुंचे हे तो ये सुनकर वोह चउक गे। अउ सीएम रमन सिंह ह जून तक बिजली पहुंचाए के वादा करिस। डॉ रमन सिंह ह कहिस कि लोक सुराज के उद्देश्य हे गांव के समस्या ल गांव म ही सुलझाना हवय। सीएम ह कहिन कि लोक सुराज के सफलता तुंहर मन के चेहरा म आए मुस्कुराहट ले पता चलत हे।
तहसीलदार ल दीस चेतावनी
लोक सुराज के दौरान ग्रामीण मन ह मुख्यमंत्री ले शिकायत करिस कि तहसीलदार ग्रामीण मन ल अपन घर बर ईंट नइ बनान देवत हे। बार बार जब्ती के कार्रवाई करत हवय। जेमा सीएम ह नाराजगी व्यक्त करत हुए कहिस कि ये काम तहसीदार के नइए। कोनो भी व्यक्ति अपन घर बर ईंट बना सकत हवय। रेत निकाल सकत हे। ये कोनो व्यवसाय नइ कर त हे। एखर सेती हस्तक्षेप करे के जरूरत नइए। तहसीलदार अपन काम करय। मुख्यमंत्री ह कलेक्टर ले कहिस वो ह तहसीलदार ल समझा दय अन्यथा उंखर खिलाफ कड़ी करवाई करे जाही।
बिजली विभाग के ईई के सेवावृद्धि के घोषणा
पत्थलगांव संभाग के ईई केडी भौमिक ह मजरा टोला मन के विद्युतीकरण म बढ़िया कारय करिस हे जेखर बर सीएम ह प्रश्नता व्यक्त करिस हे। भौमिक ह बताइस कि पत्थलगांव ब्लॉक के विद्युतविहीन 529 मंजरा टोला म विद्युत कनेक्शन के काम तेजी ले चलत हे। जून 2018 तक शत प्रतिशत गांव मन म बिजली लग जाही। अइसने लो वोल्टेज के समस्या के निराकरण बर पत्थलगांव म 132 kv के सब स्टेशन के काम चलत हवय जे ह मई म पूरा हो जाही। मुख्यमंत्री ह भौमिक ले कहिस कि आप मन के काम अच्छा हवय। आपके कतका नौकरी बचे हे। भौमिक ह बताइस कि जुलाई 18 म उओखर रिटायरमेंट हवय। मुख्यमंत्री ह कहिन कि आप ल अतका जल्दी रिटायर नइ करन। उम्मन ह मंच ले भौमिक के सेवा वृद्धि करे के घोषणा करिस हे। मुख्यमंत्री के संग मुख्य सचिव अजय सिंह, विशेष सचिव मुकेश बंसल, विधायक शिवशंकर पैकरा घलो मवजूद रहिस हे।
