पिंकी शाह ल स्थगन  मिले ले मिलिस काफी राहत

धमतरी। जनपद पंचायत नगरी म आज अविश्वास प्रस्ताव म मतदान होवइय रहिस हे। लेकिन हाईकोर्ट ह एमा स्थगन आदेस जारी कर दिस जेखर ले जनपद अध्यक्ष पिंकी शाह, उपाध्यक्ष रामदयाल समेत  भाजपाइ मन ल राहत मिलगे।

बता दन के कांग्रेस के सरकार आत ही नगरी जनपद अध्यक्ष अउ उपाध्यक्ष के खेलाफ सदस्य लामबंद हो गिन।  जनपद सदस्य अशोक सोम के नेतृत्व म पाछू दिन म कलेक्टर ल ज्ञापन सउपके अध्यक्ष अउ उपाध्यक्ष के खेलाफ अविश्वास प्रस्ताव  बर  आवेदन दिय गे रहिस हे। कलेक्टर ह एला स्वीकार करत हुए 3 जनवरी के तिथि नियत करे रहिस हे।  जइसे ही ए खबर भाजपाई मन मिलिस त उमन सकते म आ गे अउ हाईकोर्ट म याचिका दायर करिन। आज हाईकोर्ट ह ए संबंध म स्थगन आदेस जारी कर देय हे। ए आदेश के बाद भारतीय जनता पार्टी के समस्त कार्यकर्ता मन ह जनपद अध्यक्ष पिंकी शिवराज शाह , उपाध्यक्ष राम दयाल साहू ल बधाई दीस। जनपद अध्यक्ष, उपाध्यक्ष अउ भाजपा  जिला अध्यक्ष राम रोहरा ह ए ला सच्चाई के जीत बताइस हे।  अविश्वास प्रस्ताव लावइया सबो सदस्य मन के कहिना हे के हम सबो आज भी एक हवन। अउ  फेर ले अविश्वास प्रस्ताव लाए बर  तइयार हन। ज्ञात हो कि जनपद अध्यक्ष रहत हुए सिहावा विधानसभा चुनाव लड़इया पिंकी शाह ल कांग्रेस ले करारी मात मिलिस हे। ओखर बाद अविश्वास प्रस्ताव  ह उमन के चिंता ला  बढ़ा दिस। अभु स्थगन आदेश मिले ले काफी राहत मिले हे।