पुनिया ह पूछिस…कइसे हारेव…प्रत्यासी मन कहिन के …भीतरघात ले डूबिस…कुछ मन कहिन के …जोगी कांग्रेस जुम्मेदार…

रायपुर। विधानसभा चुनाव म बड़े जीत के बाद अब छत्तीसगढ़ कांग्रेस लोकसभा चुनाव के तइयारी म जुट गेहे। विधानसभा चुनाव म हारे हुए उम्मीदवार के संग आज प्रदेस प्रभारी पीएल पुनिया समीक्षा बइठक करिन। उमन ए नेता मन ल  कई निरदेस देय हे।

प्रदेस कांग्रेस ह विधानसभा चुनाव म हारे हुए प्रत्यासी मन के हार के वजह ल लेके रविवार के मंथन करिस। प्रदेस कार्यालय राजीव भवन म प्रदेस प्रभारी पीएल पुनिया ह बइठक लेके विधानसभा चुनाव म हारे हुए 22 प्रत्यासी मन ले  एक-एक कर के चरचा  करिन। अधिकांस प्रत्यासी मन  ह भीतरघात होय के  सिकायत करिन हे। एमा  पुनिया भीतरघाती मन उपर कार्रवाई करे के आश्वासन देय हे।

कांग्रेस ह हारे हुए प्रत्यासी मन के मइराथन बइठक लिन। बइठक लगभग 3 घंटा तक चलीस। पुनिया ह एक-एक प्रत्याशी मन ले चरचा करिन अउ हार के वजह ल जानिस।  प्रत्यासी मन ह बताइस के उंखर  विधानसभा क्षेत्र म भीतरघात करे गेहे।  उहें कुछु मन जोगी कांग्रेस के वजह  ले हार के सामना करे के बात कहिन।   पुनिया ह  प्रत्यासी मन ले  लिखित म सिकायत घलो मांगिस।

श्री पुनिया ह  हारे  सबो प्रत्यासी मन ल अपन क्षेत्र म सक्रिय रहे के निरदेस दिस हे। संग ही स्थानीय मुद्दा अउ समस्या मन ल दूर करे  के निरदेस देये हे।  संग  ही लोकसभा चुनाव म सक्रिया रूप ले कार्य करे के निरदेस दिस हे। ज्ञात हो के प्रदेस म कांग्रेस ह विधानसभा चुनाव म धमाकेदार जीत दरज करे हे।  90 सीट वाले विधानसभा म 68 सीट म कांग्रेस ह परचम लहराइस हे। उहे 22 सीट म उमन ल हार के सामना करना पड़िस हे। कांग्रेस ए 22 सीट म  हार के कारन  जानना चाहत रहिस हे। एखर सेती हार के वजह ल लेके  मंथन करे गिस।