पुलिस-नक्सल मुठभेड़ म सुरक्छाबल मन ल मिलिस कामयाबी…. तीन नक्सली मन ल मार गिराइस

सुकमा। जिला के मुलेर इलाके के जंगल म पुलिस-नक्सली मुठभेड़ म सुरक्छाबल मन ल बड़ कामयाबी मिलिस हे। मुठभेड़ म पुलिस ह एक एलओएस कमांडर अउ एक मिलिसिया के डिप्टी कमांडर के संग तीन नक्सली मन ल मार गिराइस हे। उहें एक नक्सली ल जिंदा पकड़े म पुलिस कामयाब रहिस हे। सुरक्छ बल मन ह मउवका ले चार भरमार बंदूक एक 315 बोर का कट्टा अउ एक पाईप बम बरामद करिन हे। फोरस के मानन त मुठभेड़ म तीन ले ज्यादा नक्सली मन ल गोली लगिस हे । जे मन ल अपन संग भाग लेय म कामयाब रहिन ।
आपमन ल बतादन के नक्सल इलाका म चलाय जात ऑपरेसन प्रहार के तहत नक्सली मन उपर लगातार सुरक्छाबल मन के दबाव बढ़त हे। माओवादी मन के अड्डा म फोरस के टीम दबिस देके उमन तबाह करत हे। फोरस के लगातार नक्सली मन के मुठभेड़ होवत हे। जेमा कई माओवादी मन के मउत हो चुके हे। लगातार बढ़त फोरस के दबाव अउ सरकार के पुनरवास नीति ले प्रभावित होके नक्सली अहिंसा के राह छोड़के समाज के मुख्य धारा म जुड़त हे।