पुलिस प्रसासन ह करे हे काबिले तारीफ पहल……पुलिसकर्मी म खुसी के माहुल…पढ़व पूरा खबर

धमतरी। छत्तीसगढ़ म पुलिस विभाग ह जिला म एक नवा पहल करे हे। जेमा पुलिस कर्मी मन ल उंखर जन्मदिन म एक दिन के छुट्टी दे जाही। अतका ही नइ बलकि उंखर बर्थडे ल संबंधित थाना म धूमधाम से मनाए जाही। ये पहल ले जिहां एक डहर जिला के पुलिस कर्मा मन म खुसी के माहुल हे । उहे दूसर डहर एएसपी के मानना हे कि ये फइसला के बाद पुलिसकर्मी मन म तनाव के हालत कम होही। पुलिसकर्मी अपन परिवार के संग भी समय बीता पाही जेखर ले माहुल म बदलाव होही। अउ अवसाद के हालत कम बनही।
दरसअल धमतरी छत्तीसगढ़ के पहिलीअइसे जिला हे, जिहां पुलिस कर्मी मन के मनोबल बढ़ाए बर नवाचार योजना के सुभारंभ करे गिस हे। ये योजना के सुरूआत अर्जुनी थाना ले होइस हे। जिहां पदस्थ आरक्षक तरूण साहू के जन्मदिन ल केक काट के सेलिब्रेट करे गिस। इही दउरान अधिकारी ले लेके थानेदार अउ सहकर्मी मन ह ओला जन्मदिन के बधाई दीस। एखर बाद आरक्षक तरूण साहू ल एक दिन के छुट्टी दे गिस। ताकि वो ह अपन परिवार के संग समय बिता सकय। पुलिसकर्मा मन के तनाव ल दूर रखे बर जिला पुलिस प्रशासन ह जो पहल करे हे वोह काबिले तारीफ हे। पुलिस कर्मी ल परिवार के संग समय बिताए के मौउका मिल जाही, एखर संग ये छुट्टी मानसिक तनाव ल दूर करे म भी कारगार साबित होही।
गौरतलब हे कि, पुलिस कर्मी मन ल साप्ताहिक अवकाश दिए जाए के मांग अरसा पुराना हे। सरकार ह प्रदेश भर म पुलिस के कार्यप्रणाली म सुधार लाए बर भले ही ट्रेनिंग अउ कार्यशाला मन के आयोजित करत हे, एखर बावजूद प्रदेश म तनाव के चलत कई पुलिसकर्मी मन के आत्महत्या के मामला घलो आगू आवत हे। अक्सर छुट्टी न मिले ले परेशान पुलिसकर्मी तनाव के कारण गलत कदम उठा लेथे। पुलिसकर्मी मन के तनाव ल दूर रखे बर पुलिस जो पहल करे हे उखर ले वइया समय म फायदा मिल ही। पुलिसकर्मी ल परिवार के संग समय बिताए के मउका अउ छुट्टी ह मानसिक तनाव ल दूर करे म कारगार साबित होंही।