जांजगीर-चांपा । सक्ती विधानसभा के ग्राम अफरीद म मतदान ल लेके बड़ी लापरवाही आघू आईस हे। ये पोलिंग बूथ म 670 मतदाता हे, लेकिन मतदान के दिन जब आखिरी म ईवीएम के जांच करे गिस त पता चलिस के येमा 720 मत पड़िस हे। ग्राम अफरीद के पोलिंग बूथ क्रमांक 33 म पीठासीन अधिकारी के लापरवाही के चलत ए बड़े कारनामा होइस हे।
दरअसल पीठासीन अधिकारी ने मतदान सुरू होए ले पहिली मॉक पोल करववाइस। लेकिन मॉक पोल ल डिलिट करना भूल गिस। लिहाजा जब संझा के मतदान खत्म होइस। तब कुल मतदान के जांच करे गस त मतदान कर्मी मन ल अपन गलती क अहसास होइस। ये पूरा मामला के जानकारी कलेक्टर अउ जिला निरवाचन अधिकारी नीरज कुमार ह भारत निरवाचन आयोग ल भेज दीस हे। अब ए समस्या के समाधान कइसे होही। ए केंद्रीय निरवाचन आयोग ह तय करही।
बता दन के मॉक पोल ल डिलिट नइ करे के वजह ले कुल मतदान म 50 वोट मन म अंतर आवत हे। अब परेसानी खड़े हो गिस हे के जे 50 मत अधिक पड़े हे, वो ह काखर हिस्सा म गिस हे अउ ये अतिरिक्त मत मन के विभाजन कइसे करे जाही। पोलिंग बूथ क्रमांक 33 अफरीद के एजेंट अशोक राठौर ह बतास के बूथ म 670 मतदाता मन ह अपन मत के इस्तेमाल करिस हे। लेकिन वोटिंग के बाद जब कुल मान्य वोट मन के गिनती होइस तब मसीन 720 वोट बतावत हे। हालांकि ए बात के जानकारी पीठासीन अधिकारी ह उहां मउजूद पोलिंग एजेंट मन ल बताइस अउ लिखित म जवाब घलो दिस हे। उहें एखर सूचना उमन ह अपन उच्चाधिकारी मन ले दीस हे।
कोनो के खाता म नइ जावय मॉक पोल के वोट…….अब लोगन के बीच कौतूहल के बेसय ए हे के मॉक पोल म पड़े 50 वोट आखिर काखर खाता म जाही। हालांकि निरवाचन ले जुड़े अधिकारी मन के कहिना हे के ए वोट मन कोनो के खाता म नइ जावय। काबर के मॉकपोल के 50 परची ल पीठासीन अधिकारी ह पोलिंग एजेंट मन के आघू निकाले हे अउ बाकायदा सील करिस हे , लेकिन ए होइस के इवीएम मसीन के आंकड़ मन ल डिलिट नइ करिस।
