पोस्टल बैलेट म गड़बड़ी ….. निर्वाचन आयोग पहुंचिस कांग्रेस

रायपुर । मतदान म गड़बड़ी ल लेके  कांग्रेस निर्वाचन आयोग के दरवाजा खटखटावत रहिस हे।  अब पोस्टल बैलेट म गड़बड़ी के आरोप लगात हुए कांग्रेस फेर निर्वाचन आयोग पहुंच गे।

आदिवासी कांग्रेस के प्रदेस अध्यक्ष अउ सीतापुर विधानसभा क्षेत्र ले कांग्रेस उम्मीदवार अमरजीत भगत मुख्य निर्वाचन पदाधिकारी कार्यालय पहुंचिस हे। कांग्रेस प्रतिनिधिमंडल ह मुख्य निर्वाचन पदाधिकारी ले मुलाकात करिन।  कांग्रेस ह पोस्टल बैलेट म गड़बड़ी  कर के सिकायत करिस हे।  आयोग ले  सिकायत के आधार म कार्रवाई के मांग करिस हे।

अमरजीत के कहिना हे के पोस्टल बैलेट म गड़बड़ी करत हुए डाक मतपत्र नइ देय के षड्यंत्र करे जात हे।  स्वतंत्र  अउ निष्पक्ष निर्वाचन ल प्रभावित करे के कोसिस करे जात हे। ए प्रजातंत्र बर उचित नइए।  कोनो भी नागरिक ल उंखर मौलिक अधिकार (मताधिकार) ल रोकना कानूनन अपराध हे।  एखर जांच कर दोषी अधिकारी मन के खेलाफ कार्रवाई  करे जाए।