रायपुर। राज्य सासन के सासकीय सेवा ले रिटायर्ड पेंसनर मन बर हर बछर लगभग 2 लाख रूपिया बेमेतरा जिला-प्रसासन द्वारा स्वास्थ्य बिभाग ल दे जाथे। जेकर बर जिला अस्पताल म लगभग 5 हजार ले जादा पेंसनर मन पंजीयन घलो कराए हे। फेर पाछु 3 बछर ले फंड नइ मिले ले पेंसनर मन ल दवई मिलना बंद हो गे हे। उहें जिला अस्पताल के सिविल सर्जन के कहिना हे कि राज्य ससन के मिले 2 लाख रूपिया कार्यलय म हे, अऊ ओमन करा ले खाली 5 लोगन मन ही पंजीयन कराए हे।
जेकर भी इच्छा राजनांदगांव म चुनई लड़े के हे, ओमन के स्वागत हे
लोक सुराज अभियान के तीसर चरन के दूसर दिन सोमवार के समाधान सिविर के दउरा म मुख्यमंत्री रमन सिंह बिलासपुर सहर पहुंचिस। इहां ओहर बिलासपुर अऊ मुंगेली जिला के अधिकारी सहित आईजी अऊ कमिश्नर के क्लास लेत बेरा ही केंद्र अऊ राज्य सरकार के जम्मो योजना अऊ बिकास कार्य के समीक्षा बइठक करिस। मुख्यमंत्री डॉ. रमन ह प्रेस कांफ्रेस म जोगी उपर तंज कसत हुए कहिस कि जेकर भी इच्छा राजनांदगांव म चुनई लड़े के हे, ओमन के मय ह स्वागत करथंव।
भानुप्रतापपुर म रसोइया संघ अपन 7 सूत्रीय मांग ल लेके अनिस्चितकालीन हरताल म
कांकेर जिला के भानुप्रतापपुर म रसोइया संघ अपन 7 सूत्रीय मांग ल लेके अनिस्चितकालीन हरताल म चल दिन हें। आप मन ल बता दन कि प्रदर्सनकारी मन स्कूल म मीड-डे मील योजना ल प्रभावित करे बर स्कूल म खाना बनाइया उपर लगभग दू हजार रूपिया जुर्माना लगाए के घोसना करे हे। एकर संग ही बछर 1995 ले कार्यरत रसोइया ल नियमित करे बर रसोइया श्रमिक मन ल 12 महिना के मानदेय दे हे, अऊ हर बछर 13 दिन के आकस्मिक अवकाश देए जइसे मांग करत हे। उहें आंदोलनकारी मन बताइन कि जब तक सरकार ओमन के मांग पूरा नइ करही, तब तक आगु घलो आंदोलन जारी रिइही।
3 अनाथ कन्या के रीति-रिवाज ले बिहाव करवाइन कंचनबाग महिला मंडल ह
राजनांदगाव के कंचनबाग महिला मंडल ह 3 अनाथ कन्या के रीति-रिवाज ले बिहाव करवाइन। उहें ये बिहाव म समाज कल्यान बोर्ड के राज्य मंत्री शोभा सोनी ह सामिल होके ये बिहाव ल सहारानीय कार्य बताइस अऊ महिला मंडल के प्रसंसा घलो करिस।
लालबाग म साढ़े 6 लाख रुपिया के लूट
राजनांदगाव सहर के बसंतपुर थाना क्षेत्र के लालबाग म एक किराना व्यापारी ले लूट के वारदात होइस। बताए जात हे कि बेपारी आनंद तेजवानी दुकान बंद करके रात म घर लहुटत रिहिस। तभू सिंधु भवन कना 3 अज्ञात बाइक सवार नकाबपोश युवक मन ओकर ले बैग छीन के फरार हो गिन। बैग म लगभग साढ़े 6 लाख रुपिया रिहिस। ये दउरान ओहर बेपारी के संग मारपीट घलो करिन। ऐती वारदात के जानकारी मिलत ही पुलिस सक्रिय हो गे हे।
