रायपुर। फरजी रायल्टी परची के माध्यम ले खनिज बेभाग ल आरथिक क्षति पहुंचाइया 6 आरोपी मन ल विसेस अनुसंधान सेल के टीम ह गेरफ्तार करिन।
बतादन के पकड़े गे आरोपी मन म अजय कुमार अग्रवाल, आशुतोष अग्रवाल, संदीप जैन, सुरेश उर्फ बंटी होतवानी, रितेश मानिकपुरी व राजेन्द्र कुमार गिलहरे हे। बताय जात हे 28 सितंबर 2018 म खनिज साखा के ओर ले उपनिरीक्षक नरसिंह धु्व्र ह सिविल लाईन थाना म सिकायत करिन के आरोपी मेसर्स संतोष अग्रवाल के पार्टनर आशुतोष अग्रवाल ह नगर पालिका परिषद डोंगरगढ़ जिला राजनांदगांव म नाला निरमान कारय म उपयोग लाय गे 206 नग रायल्टी परची म मात्रा 4232 टन, 3223 घनमीटर गिट्टी चुकता प्रमान बर खनिज साखा राजनांदगांव म आवेदन देय रहिस हे।
आवेदन के संग आरोपी आशुतोष अग्रवाल ह स्वयं के हस्ताक्षर करे आधार कार्ड, पेनकार्ड के फोटोकापी घलो जमा करय रहिस हे, ओखर संग नोटरी के सत्यापित प्रमान पत्र घलो प्रस्तुत करिन। रायल्टी परती के जांच बर खनिज निरीक्छक एफ. एल. नागेश ल भेजे गिस । जांच के दउरान 206 नग चूना पत्थर रायल्टी परची फरजी प्रतित होवत रहिस हे । खनिज निरीक्छक ह खनिज साखा रायपुर म संपरक कर के पता करिन त ए जानकारी मिलिस के उहां ल रायल्टी परची जारी ही नइ करे गिस हे । रायल्टी परची म लगे सील मोहर फरजी हे । जेखर ले मामला ल विसेस अनुसंधान सेल ल सउपे गिस।
विसेस अनुसंधान सेल के टीम ह जांच के दउरान फरजी रायल्टी परची के बारे म पेटी ठेकेदार अजय अग्रवाल ले पूछताछ करिस त सुरेश उरफ बंटी होतवानी द्वारा देना बताइस । जेखर ले पुलिस के टीम ह सुरेश उर्फ बंटी होतवानी ले पूछताछ करे गिस त वो ह रितेश चौधरी द्वारा 206 नग रायल्टी परची देना बताइस। रितेश मानिकपुरी ले पूछताछ म वो ह संदीप जैन को नाम लिस अउ संदीप जैन ह खनिज साखा रायपुर के डिलींग क्लरक राजेन्द्र गिलहरे द्वारा देना बताइस। ये तरह पुलिस ले ये मामला म सामिल सबो 6 आरोपी मन ल गेरफ्तार करे गिस हे।
Other Articles
कंसोल इंडिया उपर निसाना साधिस भूपेश बघेल ह
गोवा पुलिस के ए कारय के ग्रामीन मन करिन प्रसंसा
