‘बदलवा के स्थिति के चलत बनत हे कांग्रेस के सरकार’

भूपेश ह पत्रकार मन ले चर्चा करत सबो झन ल प्रेसित करिन धन्यवाद

रायपुर। वक्त के हे बदलाव के नारा के संग कांग्रेस ह प्रदेस म चुनाव लड़िस अउ जनता ह सानदार जीत देके ए नारा ल साबित कर दिस के वास्तव म प्रदेस म बदलवा के स्थिति हवय। जेखर चलत कांग्रेस के सरकार बनत हवय।

पत्रकारवार्ता के दउरान प्रदेश कांग्रेस कमेटी के प्रदेशाध्यक्ष भूपेश बघेल ह कहिन के प्रदेस प्रभारी पीएल पुनिया के मार्गदर्शन ले अउ उंखर सहयोगी साथी चंदन यादव समेत प्रदेस  के सबो नेता मन ल धन्यवाद देवत हुए कहिन के चुनाव जीते बर जे रूपरेखा तइयार करे गेहे रहिस हे वो  सफल होइस।

प्रसिक्षन के रूपरेखा , बूथ बनाए के कार्य करेन उहें कार्यकर्ता चट्टान के तरह खड़ा रहिन अउ भाजपा के 65 प्लस ल स्वीकार करत हुए नरेन्द्र मोदी, अमित शाह अउ प्रदेस के मुख्यमंत्री डॉ. रमन सिंह ल धुल चटाएन । संग ही  उमन ह  मीडिया के लोगन ल घलोक धन्यवाद दिस।

राहुल गांधी ह जे वादा करिन के कांग्रेस के सरकार बनते ही 10 दिन म किसान मन के करजा माफ होही। ओला सबले पहिली कर जाही।  जोगी के मामला म उमन कहिन के अजीत जोगी बर कांग्रेस के दरवाजा हमेसा-हमेला बर बंद हो चुके हे। उहें झीरम मामला के जांच करए के बात कहिन।

जमीनी कार्यकर्ता मनल बधाई देवत हुए उमन पत्रकार मन ले कहिन के  जे वादा उंखर बर करे गेहे ओला भी पूरा करे जाही। ए बीच भूपेश बघेल ह कहिन के  जे अधिकारी निरंकुश हो चुके हे। उमन उपर निश्चित रूप ले कार्यवाही करे जाही। लेकिन बदला के राजनीति नइ करन। कानून अपना कार्य करेही स जेमा सुपर सीएम घलो  सामिल हे।