खास बात
0 तेंदूपत्ता तोड़य्या महिला ल चरन पादूका पहिनाइस मोदी ह
0 पीएम ह स्थानीय भाषा म करिन लोगन मन के अभिवादन
0 इहां के बेटी मन विस्वस्तर पहचान बनावत हे…मोर उमन ल नमन
0 छत्तीसगढ़ के सुरक्षाबल मन के जवान मन के तारिफ करिन
रायपुर । प्रधानमंत्री नरेन्द्र मोदी छत्तीसगढ़ के बस्तर संभाग के घोर नक्सल प्रभावित बीजापुर जिला के जांगला पहुंचिन। इहां उमन आम सभा ल संबोधित करिन। पीएम मोदी ह स्थानीय भाषा म लोगन मन के अभिवादन करिन। मोदी ह कहिन कि बस्तर समेत पूरा छत्तीसगढ़ ल जय जोहार। आगू मोदी ह कहिन यदि देस के गरीब के बेटा आज प्रधानमंत्री हे तो ये घलो बाबा साहेब अंबेडकर के देन हे। अंबेडकर जयंती म जनता ल संबोधित करत हुए पीएम मोदी ह कहिन कि बाबा साहेब चाहतिस तो देस- विदेस म कोनो भी सुख सुविधा मन के बीच अपन जीवन यापन कर सकत रहिन हे, लेकिन उमन अइसे नइ करिस।
पीएम मोदी ह कहिन कि छत्तीसगढ़ के धरती ह कई वीर देय हे। इहां के बेटी मन विस्व स्तर म पहचान बनावत हे। मोर उमन ल नमन। मोदी ह कहिन कि 14 अप्रैल के दिन देस बर बड़े गरव करे वाला दिन हे। आज बाबा साहेब अंबेडर के जन्मदिन हे । पीएम मोदी ह छत्तीसगढ़ के सुरक्षाबल मन के जवान मन के तारिफ करिन। मोदी ह कहिन कि इहां बस्तर के विकास बर जवान चैनात हे ये दउरान उमन के सहादत घलो होवत हे। ओखर बाद भी बस्तर के विकास बर हिम्मत दिखाए म कमी नइ करस हे। उमन मैं नमन करत हव।
संबोधन ले पहिली पीएम मोदी ह आयुस्मान भारत योजना, रायपुर बस्तर रेल परियोजना,जगदलपुर म एयरपोर्ट अउ बस्तर नेट परियोजना मन के शुभारंभ करिस। एखर संगे -संग सड़क परियोजना, बस्तर म विकास के आन योजना मन के सुभारंभ किया। एखर संग पीएम मोदी ह तेंदूपत्ता तोड़य्या महिला ल चरन पादूका पहिनाइस।
सभा स्थल म लगे स्टॉल के करिन निरीछन
पीएम मोदी ह बीजापुर म हेल्थ सेंटर के उद्घाटन करिन। एखर संगे- संग देस बर आयुस्मान भारत योजना के सौगात पीएम ह दीस। सभा स्थल म लगे स्टॉल के निरीछन करिस अउ उहां भी लोगन मन ले चरचा करिस। पीएम मोदी बिहनिया 11 बजे जगदलपुर पहुंचगिन । एखर बाद उमन ह इहां ले बीजापुर के जांगला बर रवाना होगे रिहिस। पीएम मोदी तय कार्यक्रम ले करीब 20 मिनट पहिली जांगला रवाना होगे रहिस हे।
बता दन कि पीएम मोदी के जगदलपुर म मुख्यमंत्री डॉ. रमन सिंह समेत आन मंत्री मन ह स्वागत करिन । ये मवका म र केबिनेट मंत्री प्रेम प्रकाश पांडेय, बृजमोहन अग्रवाल, राज्यसभा सांसद रामविचार नेताम समेत आन मनखे मन हाजिर रहिन। घोर नक्सल प्रभावित बीजापुर म पीएम मोदी के सुरक्षा बर चप्पा- चप्पा म सुरक्षा बल तैनात रिहिस हे।
