बैगा समुदाय बर बरदान साबित होवत हे बाईक एम्बुलेंस

संजू गुप्ता

कवर्धा। कबीरधाम जिला के सुदूर अऊ दुर्गम पहाड़ी इलाका मन म रहइया पिछड़े जनजाति बैगा समुदाय बर बाईक एम्बुलेंस बरदान साबित होवत हे। कबीरधाम जिला के कलेक्टर  अवनीश कुमार शरण ह बिरसपत के दिन बोडला विकासखण्ड के दलदली म बाइक एम्बुलेंस चलाके घलोक देखिस।

आप मन ल हम बता देवन के ग्राम पंचायत दलदली जिला मुख्यालय ले करीबन 90 किलोमीटर दुरिहा हे। ये गांव पहाड़ी मन के बीच म बसे हे। दलदली के बनांचल म रहइया परिवार के अच्‍छा स्वास्थ्य सुविधा देहे बर प्राथमिक स्वास्थ्य केन्द्र संचालित हे। ए प्राथमिक स्वास्थ्य केन्द के प्रत्यक्ष लाभ तीर-तखार के केसर्मदा, बांकी ग्राम पंचायत, चेन्द्रादादर, भूरसीपकरी, संग आसपास के दस ले जादा गांव के मनखे मन ल मिलत हे। स्वास्थ्य विभाग के अमला ह बताइस बाइस एम्बुलेंस मिले के बाद वनांचल क्षेत्र म स्वास्थ्य सुविधा मन म विस्तार होए हे। पहाड़ी मन अऊ एकपंइया रद्दा मन म ये बाइक एम्बुलेंस लउहे पहुंच जाथे। बाइक एम्बुलेंस मिले ले क्षेत्र म सुरक्षित संस्थागत प्रसव म बढ़ोतरी होय हे, ए हिसाब से एखर से शिशु मातृत्व मृत्यु दर म घलोक कमी आए हे। एहू बात हे के जिला के वनांचल क्षेत्र मन म बेहतर स्वास्थ्य सुविधा मुहैया कराए बर पंडरिया विकाखण्ड के कुकदूर, बोडला विकासखण्ड के बोक्करखार अऊ दलदली,छिरपानी अऊ झलमला प्राथमिक स्वास्थ्य केन्द्र बर बाईस एम्बुलेस के सुविधा देहे जात हे।