यू-ट्यूब म पसंद करे जात हे फिलिम के गाना, 30 मार्च ले प्रदेश रिलीज करे के हे तैयारी
जय जोहार. ओम शिव सांई फिल्म्स के बैनर तले निर्मित अऊ बहुचर्चित फिलिम “पढ़ाई म जीरो तभो ले हीरो” के गाना ह ऐ दरि यू ट्यूब म धूम मचा दे हे। लोगन मन ऐ गाना ल अब्बड़ पसंद करत हे। माने जात हे कि फिलिम के गाना के लाईक अऊ शेयर ल देखके लोगन मन ऐ फिलिम के बेसब्री ले इंतजार करत हे। फिलिम के यूनिट ह घलो 30 मार्च ले ऐ फिलिम ल रिलीज करे के तैयारी करत हे। ऐ फिलिम के एक गीत जय-जय-जय सियाराम म बजरंगी भाईजान के झलक मिलथे शायद इही वजह हे कि ऐला काफी पसंद करे जात हे।
ऐ गाना म हनुमान जी के विशाल मूर्ति ह अब्बड़ आकर्षक लागत हे जेखर फिल्मांकन बर यूनिट ल काफी मेहनत करे ल पड़िस। फिल्मांकन ल देख के ऐ मेहनत साफ झलकत हे। निर्माता जेठू साहू ह बताथे कि फिलिम के कथानक कसे हुए हे जेन ह दर्शक मन ल बांध के रखे में कामयाब साबित होही। फिलिम के प्रमोशन ह दर्शक मन के बीत होवईया जिज्ञासा ल पैदा करे म सफल होही। फिलिम के हीरो एवं लेखक व डायरेक्टर केशव वैष्णव ह बताईन कि फिलिम म पिता व पुत्र के बीच दंद्व के कहानी घलो हे। पिता अपन बेटा ल लेके कई सपना देखथे। लेकिन पढ़ाई म जीरो ऐ फिलिम के हीरो अपन व अपन पिता के सपना ल लेके संजीदा हे। अऊ अपन सपना ल पाए के हरसंभव परयास कर सफलता हासिल करे के सोचत हे। मर्यादित पिता ह भले सामाजिक परम्परा ले बंधे हे लेकिन ओला अपन पुत्र के भविष्य ल लेके चिंता हे ऐखर फलस्वरूप पिता-पुत्र के बीच टकराव के स्थिति निर्मित हो जथे।
फिलिम के हीरो जेन ह पढ़ाई म फिसड्डी हे एक दिन अईसे काम कर देथे कि ओ ह दुनिया म हीरो बन जथे। इही ताना-बाना के बीच बने ऐ फिलिम ह बेहतर बन पड़े हे। फिलिम 30 मार्च ले प्रदेश के विभिन्न सिनेमागृह म प्रदर्शित होही। फिल्म का प्रमोशन घलो अच्छा होए हे जेखर ले यूनिट आश्वस्त हे कि फिलिम ह सफलता के नवा कीर्तिमान स्थापित करही। पिता-पुत्र के बीच द्वंद के अलावा ऐ फिलिम म पारिवारिक रिश्त मन म खट्टा-मिठा अहसास घलो हे। दोस्ती के रिश्ता ल बखूबी फिल्माए गे हे। जेमा नायक-नायिका के नादान प्यार के सीन ह घलो दर्शक मन ल लुभाए बर तैयार हे।
ऐ फिलिम के निर्माता जेठू साहू हे। गीत-संगीत रोशन वैष्णव के हे। फिलिम के मुख्य कलाकार केशव वैष्णव अऊ सोना द्धिवेदी हे। अन्य कलाकारों में राशि पाण्डेय, जेठू साहू, उपासना वैष्णव, अरविंद गुप्ता, महावीर, दीपक, शक्ति, नरेश, विजय आदि हे। फिलिम के निर्देशक अऊ लेखक केशव वैष्णव हे।
देखव ट्रेलर…
https://www.youtube.com/watch?v=Sqkl6_KpLok
