भाजपा एमएलए ल चेतावनी …..संगे संग पढव अउ दूसर खबर

जशपुर। छत्तीसगढ़ के भाजपा विधायक मन ल बुधवार 11 अप्रैल के बिहनिया 11 बजे ले अपन मोबाइल कोनो भी हालत म चालू रखना होही, संगे संग कवरेज क्षेत्र म भी रहिना होही। मोबाइल बंद होइस तो उँखर उपर पार्टी कार्रवाई घलो कर सकत हे। एखर पीछू वजह ये हे कि प्रधानमंत्री नरेंद्र मोदी एक नवा पहल करत हुए बुधवार के उमन ले फोन म बात करही। एखर बर भाजपा विधायक दल ले सबो विधायक ल निर्देश जारी कर दे गेहे। बतादन कि प्रधानमंत्री मोदी 14 अप्रैल के छत्तीसगढ़ आवत हे। वोह बीजापुर म सभा ल संबोधित करही। माने जात हे कि एखर पहिलि मोदी छत्तीसगढ़ के भाजपा विधायक मन ले फोन म बात कर उंखर इलाका के बारे म जानकारी ले सकत हे।

बेमेतरा म आंगनबाड़ी कार्यकर्ता अऊ सहायिका मन के अनिस्चित कालीन हड़ताल जारी
बेमेतरा म अपन छ: सूत्रीय मांग ल लेके आंगनबाड़ी कार्यकर्ता अऊ सहायिका मन के अनिस्चित कालीन हड़ताल जारी हे। उहें अधिकारी मन हड़तालकर्मी मन ल वापिस कराए बर कई हथकंडा अपनात हे। जेकर चलत कार्यकर्ता मन बिभाग के कार्रवाई ल लेके अधिकारी मन के ऊपर आरोप घलो लगात हे। उहें 5 अप्रैल के बिभाग ह हरताली मन उपर बड़े कार्रवाई करत हुए 90 लोगन मन ल बर्खास्त करे के कार्रवाई करिन। जेकर उपर बिभाग ह दूसर दिन अपन फइसला ल बदलत हुए अब खाली 8 लोगन मन ल बर्खास्त करे के बात कहत हे।

महुआ के फूल बनिस लोगन मन बर आय के अतिरिक्त साधन
कांकेर जिला के वन परिक्षेत्र म पाए जाए वाला महुआ के फूल एक अइसे बनोपज हे, जोन आज स्थानीय लोगन मन बर अतिरिक्त आय के स्त्रोत बन गे हे। प्रदेस म किसान मन खरीफ फसल के बाद सिंचाई सुविधा नइ होए के कारन दूसर फसल नइ ले सकत रिहीन। जेकर कारन ओमन के आगु आजीविका के खतरा मंडराए बर लग गिस। फेर गर्मी के मउसम आत ही महुआ के फूल ये लोगन मन बर आय के अतिरिक्त साधनन बन गेहे।

ठेला अऊ गुमटी के ऑनलाइन रिकॉर्ड तइयार करत हे नगर निगम
बिलासपुर नगर निगम ठेला अऊ गुमटी के ऑनलाइन रिकॉर्ड तइयार करत हे। येमा GIS बेस्ड जानकारी होही। पहिली निगम कना एमन के बारे म कउनो पुख्ता जानकारी नइ होत रिहिस। फेर अब आजीविका मिसन के तहत ठेला अऊ गुमटी वाला मन बर बिसेस कार्ययोजना बनाए जात हे। एकर तहत जम्मों झन ल वेंडर जोन बनाके निगम ह जगह उपलब्ध कराही। येमा मोबाइल पोर्टल के माध्यम ले ऑनलाइन रिकॉर्ड दर्ज कराए जाही। ठेला अऊ गुमटी वाला मन के नाव, फोटो अऊ रिकॉर्ड दर्ज होही। बिक्रेता मन ले जम्मों रिकॉर्ड ले के बाद निगम ह वेंडिग जोन घोसित करही।