भाजपा के कटाक्ष….. घिनौना अपराध ल सत्याग्रह के नाम देना दुरभाग्यजनक

रायपुर। पीसीसी अध्यक्ष भूपेश बघेल के गिरफ्तारी के बाद जमानत नइ ले अउ कांग्रेस के जेल भरो आंदोलन म भाजपा ह कटाक्ष करिस हे। भाजपा कारयालय म आयोजित प्रेस कांफ्रेंस म पंचायत मंत्री अजय चंद्राकर ह कहिन के निश्चित हार के बौखलाहट म पाछु कुछु दिन ले कांग्रेस पार्टी खासकर भूपेश बघेल ह जे तरह परदेस के माहुल खराब कर नौटंकी करत हवय, उहें छत्तीसगढ़ बर ये सरमनाक हे। परदेस के जनता ह हमेसा ले अपराधी मन ल बाहिर के रद्दा दिखाय हे, अइसे म भूपेश जइसे घृनित अपराध के आरोपी ल घलो बरदाश्त नइ करही।
अजय चंद्राकर ह कहिन के ये मानसिक दिवालियेपन के पराकाष्ठा हे। एक घिनौना अपराध ल सत्याग्रह के नाम देना दुरभाग्यजनक हे। वास्तव म सत्याग्रह कभु कोनो अपराधी ल बचाय के उपक्रम नइ हो सकय। भूपेश अउ कांग्रेस के ये सत्ताग्रह हे। अइसे दुराग्रह के परदेस भर के जनता ह मुंहतोड़ जवाब दिस हे। कांग्रेस के रहे-सहे जनाधार बचे खुचे साख घलो अब नष्ट होय के कगार म हे। ये विधानसभा चुनाइ म प्रदेस के जनता ह कांग्रेस के सफाया करही,ये तय हे। हाल म जे कुछु राजनीतिक घटनाक्रम होय हे,ओखर ले कांग्रेस ह पूरी तरह अप्रासंगिक होगे हे। अपना अस्तित्व बचाय के ये कांग्रेस के नौटंकी हे।
अगर सीडी मामला म वकील नइ लेकके भूपेश ये कहत हे के उमन चूंकि निरपराध हे येखर सेती वकील नइ रखव। त का उमन ये लिस हे के ज़मीन कब्ज़ा संबंधित मामला समेत अउ अन्य आपराधिक मामला कांग्रेस अध्यक्छ उपर दरज हे, वो सबों म उमन अपराधी हे? अगर अइसे कबूल कर लिस त का अइसे अपराधी ल सार्वजनिक जीवन म रहना चाही। ज़मानत लेय के अर्थ अगर अपराधी होना हे त का कांग्रेस ये कहना चाहत हे के जमानत पर बाहिर आय उँखर पूरव राष्ट्रीय अध्यक्छ श्रीमती सोनिया गांधी अउ वरतमान अध्यक्छ राहुल गांधी अपराधी हे?