भाजपा के पलटवार ….. 2000-03 तक करेगे पाप के ठीकरा ल कांग्रेस ह काखर सिर म  फोडऩा चाहत हे? का भूपेश  ह वो कैबिनेट के हिस्सा नइ रहिस हे।

रायपुर। कांग्रेस के प्रेस वार्ता म भाजपा प्रवक्ता संजय श्रीवास्तव ह बिंदुवार जवाब दिस हे। उमन कहिन के देस म  आपातकाल थोपके लोकतंत्र के हत्या करइया  कांग्रेस के लोग, आज भाजपा उपर अलोकतांत्रिक होय के आरोप लगावत हे,  एखर ले जादा हास्यास्पद अउ कुछु नइए। चुनाव आयोग अउ सरकार के बीच फर्क के घलो तमीज नइ बचे हे कांग्रेस  म।

जब कांग्रेसी मन ए मानत हे के लोकतंत्र के हत्या अउ तानासाही कांग्रेस के ‘अवगुण’ रहे हे, अउ जब एला स्वीकार कर लेय हे त  उमन ल सबले  पहिली जनता ले माफी मांगना चाही। 2000-03 तक करे गे पाप के ठीकरा कांग्रेस ह काखर सिर म  फोडऩा चाहत हे? का भूपेश  ह वो कैबिनेट के हिस्सा नइ रहिस हे।

का कैबिनेट के सामूहिक जुम्मेदारी के बारे म भूपेश  ल नइ पता हे?   अपन पाप के ठीकरा दूसर के सर म फोडऩे के अतना बेसरमी कहां ले  लाथे कांग्रेसी मन ह? जब बार-बार अपराध करत हव त  बार-बार मुदकमा के सामना घलो करना पड़ही अउ  सजा घलो मिलही। एखर खेलाफ प्रेस वार्ता कर कांग्रेस  ह चोर बोले जोर ल  चरितार्थ करत हे।

विरोध प्रदर्शन कहां अउ  कउन तरह होथे, का ए सामान्य विवेक घलो कांग्रेस के पास नइए।  अगर बिना अनुमति पूरा गिरोह के संग अनधिकृत घुसही, धारा 144 के उल्लंघन करही त मुकदमा चलही । आघू श्रीवास्तव ह जवाब देवत कहिन के  भाजपा सरकार के नहीं कांग्रेस के अंतिम दिन हे।

अच्छा होइस के कांग्रेस ह पहिली ही कथित गंगाजल पी लीस। हमन कांग्रेस के विसर्जन के बाद उंखर सदगति के कामना करत हन । रिजल्ट के बाद कम ले  कम कांग्रेस हाफ अउ  भूपेश राजनीति ले साफ। कांग्रेस के पास अगर राजनीतिक विरोध अउ अश्लील सीडी बांटे के फर्क के तमीज नइए , त ए उंखर समस्या हे।

आदतन अपराधी इही तरह ले विवेक खो देवत हे। आदिवासी क्षेत्र मन ल उपनिवेश जइसे बनाके रखइा कांग्रेस जब आदिवासी हित के बात करते हे त उमन भेड़ के खाल म छिपे भेडिया जइसे  नजर आथे। छत्तीसगढ़ के आदिवासी बहन अउ भाइ मन  बर कांग्रेस के घडिय़ाली आंसू मन के जरूरत नइए।

कांग्रेस ह कभी किसान मन के लड़ाई नइ लड़िस।  वो ह हमेसा किसान मन ले  लड़त रहिस हे। ईवीएम अउ चुनाव आयोग उपर आरोप लगाय बर 11 दिसंबर के बाद घलो काफी मउका मिलही। अपन हार स्वीकार कर भूपेश अपन पार्टी के बचे-खुचे साख  ल बचा सकत हे। एखर उलट अपराध म अपराध करत जाए ले  भूपेश अउ अन्य अपराधी मन के दुर्गति तय हे। प्रदेश के भाजपा सरकार अपन चउथी पारी म घलो दुराग्रह ले कोनो कारवाई नइ करही लेकिन कानून अपन काम अवश्य करही।