भाजयुमो कवर्धा ह करिस समरसता भोज के आयोजन

बाबा साहेब भीमराव अंबेडकर जयंती के अवसर म भाजयुमो ह कवर्धा के वीर सावरकर भवन म समरसता भोज कार्यक्रम के आयोजन करिस। जेकर उद्देस्य जम्मों वर्ग के लोगन मन ल एक संग बिना कउनो जाति भेद के भोजन करवाना रिहिस। उहें ये कार्यक्रम म भाजपा के महामंत्री संतोष पांडेय सहित कई नेता अऊ बड़े संख्या म जम्मों वर्ग के लोगन मन सामिल होइन।

किडनी के बीमारी के इलाज बर सुपेबेडा अऊ गोहेकेला गांव म आयुर्वेदिक चिकित्सा सिविर
गरियाबंद म किडनी के बीमारी के इलाज बर दू दिन के आयुर्वेदिक चिकित्सा सिविर आयोजित करे गिस। कलेक्टर श्याम धावडे के सहयोग ले किडनी के बीमारी ले प्रभावित सुपेबेडा अऊ गोहेकेला गांव म ये सिविर के आयोजन करे गिस। सिविर के पहिली दिन सुपेबेड़ा म 200 ले ज्यादा मरीज मन के इलाज करे गिस। संग ही गोहेकेला म किड़नी मरीज मन के इलाज करे जात हे। आप मन ल बता दन कि दून्नों गांव म कइ बछर ले किड़नी के बीमारी फइले हे जेकर चलत कई लोगन मन अपन जान गंवा डारे हें। बीमारी के रोकथाम बर जिला प्रसासन ह ये पहल ल करे हे

मुंगेली म बेमउसम बारिस ले फसल ल भारी नुकसान
मुंगेली म बेमउसम बारिस ले किसान मन के फसल ल भारी नुकसान होइस हे। आप मन ल बता दन कि पाछु 3 दिन ले पानी गिरे के कारन फसल बर्बाद हो गे हे, जेकर चलत किसान मन ल भारी समस्या होत हे। उहें अब कर्जा चुकाए के चिंता ले परेसान किसान मन सरकार ले मुआवजा के मांग करत हें। आप मन ल बता दन कि फसल बर्बाद होए के जानकारी बिभाग ल अब तक नइ पहुंचे हे। अधिकारी मन फील्ड ऑफिसर ले जानकारी लेके रिपोर्ट ल सासन स्तर म भेजे के बात कहत हे।

सड़क अऊ दुकान म घूम-घूमके भीख मांगिन कार्यकर्ता-सहायिका मन
जांजगीर-चाम्पा जिला म पाछु 40 दिन ले आंदोलनरत आंगनबाड़ी कार्यकर्ता-सहायिका मन के द्वारा सासन के समक्ष बिरोध के नवा तरीका तइयार करिन हे। आंदोलनकारी मन बिरोध प्रदर्शन करत जिला मुख्यालय जांजगीर के सड़क अऊ दुकान म घूम-घूमके भीख मांगिन अऊ सरकार के खिलाफ प्रदर्सन करिन। ये दउरान ओमन सरकार उपर कर्मचारी हित के अनदेखी के आरोप लगात कहिस कि ओमन पाछु 40 दिन ले हड़ताल म हें। फेर सरकार ओमन के मांग उपर ध्यान नइ देत हे। जेकर कारन ओमन के आर्थिक स्थिति खराब हो चुके हे अऊ भीख ले मिले रकम ले ही ओमन अपन खर्च चलाही।

बीजापुर के जांगला म लगभग 12 हजार जवान मन ल तइनात
पीएम मोदी के बीजापुर दउरा ल लेके तइयारी तेज हो गे हे। कार्यक्रम के एक दिन पहिली ही अफसर अऊ मंत्री मन इहां डेरा डाले हें। आप मन ल बता दन कि 14 अप्रैल के पीएम मोदी बीजापुर के जांगला म आयुष्मान भारत योजना के तहत एक जनसभा ल संबोधित करही। फेर पीएम के ये दउरा के नक्सली मन सल्लग बिरोध करत हे। जेला देखत प्रसासन ह बीजापुर म सुरक्षा ल अऊ कड़ा कर दे हे। बीजापुर के जांगला म लगभग 12 हजार जवान मन ल तइनात करे गे हे, अऊ सभा स्थल ले 10 किलोमीटर के दायरा म 500 ब्लैक कैट कमांडो तैनात हे। सभा स्थल के तिर-तार 10 हजार जवान मन ल तइनात करे गे हे, संग ही हेलीकॉप्टर अऊ ड्रोन ले सल्लग इलाका के निगरानी करे जात हे। ये कार्यक्रम म छत्तीसगढ़ के सीएम रमन सिंह सहित कई दिग्गज नेता मौजूद रहीं।