भूपेश- सिंहदेव के साथ सैकड़ों कार्यकर्ता गेरफ्तार

रायपुर। प्रधानमंत्री नरेन्द्र मोदी के सभा म विरोध प्रदर्शन करे बर जात पीसीसी अध्यक्छ भूपेश बघेल अउ नेता प्रतिपक्ष टीएम सिंहदेव ल पुलिस ह गेरफ्तार कर लिस हे। येखर मन के संग सइकड़ों कार्यकर्ता गिरफ्तार करे गिस हे।
प्रधानमंत्री के सभा के विरोध करे बर जांजगीर जावत कांग्रेसी कार्यकर्ता मन ल पुलिस ह गेरफ्तार कर लीस। भूपेश ल कटगी म त सिंहदेव ल महमद गांव के तीर गेरफ्तार करे गिस । इमन ला फिलहाल अस्थाई हिरासत म रखे गिस हे। येखर पहिलि पुलिस कर्मी मन अउ कांग्रेसी मन के बीच जमके झड़प होइस हे। धक्कामुक्की के बाद पुलिस ह सिंहदेव के संग बड़ संख्या म कार्यकर्ता मन ल गेरफ्तार करिस। प्रदेस भर ले कांग्रेसी पीएम के सभा म विरोध दर्ज करे बर जांजगीर पहुंचत हे । कांग्रेस के नेता मन अउ कार्यकर्ता मन ह करिया कपड़ा, जूता पहिने हवय। सबो के हाथ म काला झंडा घलो हे।
बिलासपुर म मंत्री अमर अग्रवाल के घर म कचरा फेंके के बाद पुलिस ह लाठीचार्ज करे रहिस हे। जेमा पार्टी के कई कार्यकर्ता मन ल चोट आइस। घटना के विरोध म कांग्रेसी मन ह पहिली रमन सरकार के जमके विरोध करिन अउ अब मोदी के दउरा के खेलाफ प्रदर्शन करत हे।