भूपेश, सिंहदेव, ताम्रध्वज ह छत्तीसगढ़ी म लीन सपथ… त रविंद्र,अकबर, जयसिंह, रूद्र गुरू ह हिन्दी म…… बइठक के चलत भाजपा के कोनो विधायक सदन म मउजूद नइ

रायपुर। छत्तीसगढ़ विधानसभा के कार्यवाही सुरू हो चुके हे। इहें छत्तीसगढ़ विधानसभा के इतिहास म ए पहिली मउका हे, जब नवां विधानसभा के पहिली दिन विपक्ष के कोनो विधायक सदन म मउजूद नइए।

 आज विधानसभा म सदस्य मन के सपथ ग्रहन सुरू हो गेहे। सबले पहिली मुख्यमंत्री भूपेश बघेल  ह सदन म सपथ लिन, ओखर बाद टीएस सिंहदेव, फेर ताम्रध्वज साहू अउ रविंद्र चौबे। एखर बाद अन्य कैबिनेट मंत्री मन ह सपथ लिन।  सपथ ग्रहन म खास बात ए हवय के मुख्यमंत्री भूपेश बघेल, टीएस सिंहदेव, ताम्रध्वज साहू, प्रेमसाय सिंह, अनिला भेड़िया, उमेश पटेल, धनेंद्र साहू ह छत्तीसगढ़ी म सपथ लीन, उहें रविंद्र चौबे, मोहम्मद अकबर, जयसिंह अग्रवाल, अमरजीत भगत ह हिन्दी म सपथ लेहे।

लखमा अउ अंबिका के सपथ म ए हे खास

अंबिका सिंहदेव ह अंग्रेजी म  सपथ लीस। संभवत- ए पहिली बार होय हे के छत्तीसगढ़ विधानसभा म कोनो विधायक ह अंग्रेजी म सपथ लीस हे। उहें कवासी लखमा ल सपथ पढ़के विधानसभा सचिव चंद्रशेखर गंगराड़े ह सपथ के सुनाइस। जेला सुनके  लखमा ह बोलत गिस। आप मन ल पता होही के कवासी लखाम ल पढ़े बर नइ आए। एखर सेती उमन के सपथ ले सचिव गंगराड़े ह पढ़के सुनाइस।

सभापति तालिका म भाजपा ले सिरिफ एक सदस्य 

आज पांचवां विधानसभा के पहिली सत्र के कार्यवाही छत्तीसगढ़ विधानसभा म प्रोटेम स्पीकर रामपुकार सिंह ह सुरू करिन। उमन सभापति तालिका के घलोक घोसना करिन।  सभापति तालिका म भाजपा ले सिरिफ एक सदस्य शिवरतन शर्मा के नाम हे, जबके कांग्रेस के तरफ ले सत्यनारायण शर्मा, धनेंद्र साहू, अमरजीत भगत  ल सभापति तालिका म जगा दे गिस हे।

संस्कृत म शपथ लीस चिन्तामणि महराज ह

 सामरी विधायक चिन्तामणि महराज ह संस्कृत म सपथ ली। सपथ पूरा होत ही सदन म मउजूद विधायक ह धन्यवाद…महराज…धन्यवाद कहन लगिन। जेला सुन उमन मुस्कुरा दिन। पूर्व मुख्यमंत्री अजीत जोगी ह घलो छत्तीसगढ़ी म सपथ लीन। अधिकांश विधायक मन ह  हिन्दी अउ छत्तीसगढ़ी म सपथ लीन।