मतदान……घर बइठया मन ल सबक दीस ये सियान महिला मन ह

रायपुर। छत्तीसगढ़ विधानसभा चुनाव म सबो वरग के लोगन मतदान करे बर बूथ म आइस हे।  जेमा अइसन महिला मन घलो सा सामिल हे जेखर उमर 100 बछर ले जादा हे। प्रदेस के चिरमिरी, लुंड्रा अउ बैकुंठपुर म अइसन नजारा देखे बर  मिलिस जेला देखके ए एहसास होइस के उनर कोनो काम म बाधा नइ बनय। ए अइसन मन बर सबक हे जे मन मतदान केंद्र तक नइ जावय।  अतना उमर म घलो वोट करइया सियान  महिला मन तारीफ़ के काबिल हे। चिरमिरी के गोदरी पारा प्रा. शा. विद्यालय बूथ नंबर 73 म 113 बछर के सियान महिला ह मतदान करिस। उहे ग्राम पंचायत बदगरी लुण्ड्रा म 100 बछर के महिला ह मतदान कर के लोकतंत्र ल मजबूत बनाय म भूमिका निभाइस। बैकुंठपुर के पोलिंग बूथ क्रमांक 90 सासकीय प्राथमिक साला बासनपारा म 106 बछर के महिला श्रीमती समुद्री पटेल ह मतदान करिस। जय जोहार ह अइसन जमो सियान मन ल नमन करत हे के अपन वोट के महत्व समझ हुए मतदान करिस।