महंगा सामान खरीदे के लालच महंगा पड़ गिस एक चार्टर्ड अकांउटेंट ल

रायपुर। अब जमाना हे ऑनलाइन खरीदारी के, जेमा ग्राहक ल हमेसा राजा दिखाय जात हे। लेकिन दरअसल अइसना कतको बार नइ होवय। इहू म घलो धोखा खा जाथे या महंगा सामान ल सस्ता म खरीदे के लालच में रुपिया गंवाना पड़थे। अतना ही नइ, डिस्काउंट के लालच म कुछु अइसे सामान घलो खरीद ले जाथे जेखर कोनो जरूरत नइ होवय। एक अइसे ही बारदात राजधानी म होइस हे? जब एक सीए ल सस्ता सामान खरीदे के लालच ह महंगा पड़ गिस।
दरअसल, कम कीमत पर महंगा सामान खरीद के लालच म एक चार्टर्ड अकांउटेंट ल 16 लाख के ऑनलाइन ठगी के शिकार होना पड़िस। मामला राजधानी के सरस्वतीनगर थाना इलाका के कोटा के हे, जिहां सीए साकेत अग्रवाल के मोबाइल म एक अनजान नंबर ले फोन आइस अउ कहिस के शॉप लाबी डॉट कॉम (SHOPLOBY.COM) ले खरीदी करे मर प्वाइंट मिलही। जेमा कार, मोबाईल फोन अउ अन्य महंगा गिफ्ट दिय जाही। झांसा म आके पीड़ित ह ऑनलाइन खरीदी करिस, जेखर बाद सातिर ठग मन ह 25 हजार रूपिया के चेक अउ एक एप्पल मोबाइल घलो भेजिस। जेखर ले उत्साहित सीए ह आरोपी मन के अलग अलग एकाउंट नंबर म कुल 16 लाख 35 हजार 670 रूपिया जमा करिस । लेकिन पइसा डाले के बाद जब सीए के पास कोनो गिफ्ट या सामान नइ आइस त ओला ठगे जाय के अहसास होइस । सिकायत के बाद सरस्वती नगर थाना पुलिस धोखाधड़ी के मामला दरज कर आरोपी मन के तलास म जुट गेहे।