कवर्धा। जिला म बीते मंगलवार के महिला आरक्षक के दबंगई देख बर मिलिस। आप मन ल बतादन कि महिला आरक्षक मोंगरा सोनवानी ह मामूली बात म सब्जी बेचइया एक महिला के जमके पिटाई कर दीस। इहीं ये दउरान पूरा चौक म लोगन ये लड़ाई अउ मारपीट के गवाह रहिन। अतका ही नइ ये दउरान उहां मौजूद लोगन मन ह मोबाइल ले पूरा घटनाक्रम के वीडियो घलो बनाइस हे।
पीड़ित महिला मुन्नी बाई निषाद ह जब कोतवाली थाना म मामला के शिकायत करिस, तो जांच करे के आश्वासन देके महिला ल उहां ले चलता कर दिस हे। इती पूरा मामला म जांच के बाद ही कार्रवाई के बात अधिकारी मन कहिन हे।
गौरतलब हे कि नगर के महावीर चौक म मुन्नी बाई नाम के महिला सब्जी के दुकान लगात हे। इही करम म बीते मंगलवार के शाम के कोतवाली थाना म पदस्थ महिला आरक्षक सब्जी खरीदे बर महिला के दुकान म पहुंची हे। इही दउरान महिला आरक्षक के पैर सब्जी के ऊपर पड़ गे, जेमा महिला ह नाराजगी जाहिर करिस। तो महिला आरक्षक बोलिस कि जानत नइच का, मैं ह पुलिस आरक्षक हवव। लिहाजा, ये बात ल लेके उँखर मन के बीच तू तू-मैं मैं हो गिस। इहीं बीच महिला आरक्षक अतका आवेश म आगे कि ओह महिला के जमके पिटाई कर दीस। अइसे म अब पीड़ित महिला ह खाकी के दबंगई के शिकायत खाकी के पास जाके करिस हे। अब देखना हवय कि पीड़ित महिला ल न्याय मिल पावत हे या नइ । हांलाकि एकर उम्मीद कम हवय।
