मुख्यमंत्री के स्वागत म उमड़ीस कोण्डागांव नगर के जनता

कोण्डागांव । 02 जनवरी के मुख्यमंत्री भूपेश बघेल के मुख्यालय कोण्डागांव के प्रवास  म उमन के स्वागत बर जनसैलाब उमड़ पड़िस। विकास नगर स्टेडियम ग्राउण्ड म ग्रामीन मन ह अभूतपूर्व उत्साह अउ गर्मजोसी  के संग मुख्यमंत्री भूपेश बघेल के अभिनंदन करिन।

मुख्यमंत्री पद के कार्यभार ग्रहन करे  के बाद पहिली बार कोण्डागांव जिला म  आए भूपेश बघेल के सड़क के दूनों किनारा म  लोगन कतारबद्ध होके उंखर  इंतजार म खड़े रहिन। मुख्यमंत्री ह खुले वाहन म खड़े होके जनता के अभिवादन स्वीकार करिन। फूल-माला अउ बाजे-गाजे के संग उमन के नगर के जनता ह उंखर अगवानी करिन।

इहीं क्रम म जगदलपुर नाका चउक म जिहां उमन ल धान ले तउले गिस उहें  कोसरिया मरार समाज ह एनसीसी ग्राउण्ड म सब्जी अउ  लड्डू ले घलो  तउलिन। ए मउका म  बघेल ह स्वागत सभा म जनता के प्रति आभार प्रकट करत हुए जिला के सर्वांगीण विकास के बात कहिन।

ए अवसर म वाणिज्यकर (आबकारी) एवं उद्योग मंत्री कवासी लखमा, विधायक कोण्डागांव मोहन मरकाम, विधायक नारायणपुर चंदन कश्यप, प्रदेश महिला कांग्रेस अध्यक्ष फूलोदेवी नेताम, मुख्यमंत्री के संसदीय सलाहकार राजेश तिवारी, अध्यक्ष जिला पंचायत देवचंद मातलाम, उपाध्यक्ष रवि घोष स्थानीय जनप्रतिनिधि, ग्राम पंचायतों के पदाधिकारी, कमिश्नर धनंजय देवांगन, आईजी बस्तर रेंज विवेकानंद सिन्हा, जिला कलेक्टर नीलकंठ टीकाम, पुलिस अधीक्षक अरविन्द कुजूर सहित बड़ संख्या म नागरिक उपस्थित रहिन हे।