बेलौदी जलाशय के जीर्णोद्धार बर 4 करोड़ रूपिया के मंजूरी के घोसना

रायपुर। मुख्यमंत्री भूपेश बघेल आज दुर्ग जिला स्थित अपन पैतृक गृह ग्राम बेलौदी (विकासखण्ड-पाटन) म आयोजित पारिवारिक मिलन अऊ अभिनंदन समारोह म सामिल होइन। मुख्यमंत्री के रूप म पहिली गृह ग्राम आगमन म परिजन मन अउ ग्रामवासी मन ह गर्म जोशी अऊ आत्मीयता के संग श्री बघेल के स्वागत करिन।

ए अवसर म आयोजित अभिनंदन समारोह ल सम्बोधित करत मुख्यमंत्री बघेल ह कहिन के समृद्ध छत्तीसगढ़ के निरमान बर हमार पूरवज मन ह जऊन सपना देखे रहिन, ओला हमला मिल-जुल के पूरा करना हे। उमन छत्तीसगढ़ के विकास म समाज के सबो वर्ग ले सहयोग के आह्वान करिन। उमन गांव म बिताए अपन बचपन के दिन मन ल घलोक याद करिन। मुख्यमंत्री ह कहिन कि ये स्वतंत्रता संग्राम सेनानी मन के गढ़ रहे हे। ये धरा पुरातन काल ले धार्मिक, राजनीतिक अऊ सामाजिक आंदोलनों के जननी रहे हे।

मुख्यमंत्री ह समृद्ध छत्तीसगढ़ के निरमान म नरवा, गरूवा, घुरूवा अऊ बाड़ी के महत्व के उल्लेख करत क्षेत्र म सिंचाई बेवस्था, पशुधन विकास अऊ किसान मन के हित म ले गे कर्जमाफी के ऐतिहासिक फइसला मन ल दोहराइन। उमन अभिनंदन बर ग्रामवासी मन के प्रति आभार प्रकट करिन। श्री बघेल ह ग्राम वासी मन के आग्रह म बेलौदी जलाशय के जीर्णोद्धार बर 4 करोड़ रूपिया के मंजूरी के घोसना करिन। उमन संगेच गांव म गौरव रस्ता अऊ सामाजिक भवन के निरमान के स्वीकृति घलोक दीन। बघेल ह ग्राम के स्वतंत्रता संग्राम सेनानी स्वर्गीय बंशीलाल के तैलचित्र म माल्यार्पण करके कार्यक्रम के शुभारंभ करिन। सरपंच शंकर बघेल ह ग्रामवासी मन के तरफ ले अभिनंदन पत्र के वाचन करके अभिनंदन पत्र मुख्यमंत्री ल भेंट करिन।

 कार्यक्रम ल पूर्व संसदीय सचिव विजय बघेल संग सीताराम वर्मा अऊ मेहत्तर लाल वर्मा ह घलोक सम्बोधित करिन। उमन मुख्यमंत्री के राजनैतिक संघर्ष अऊ व्यक्तित्व उपर विस्तारपूरवक प्रका डालिन। ए अवसर म मुख्यमंत्री ह अपन घर के आघू म बर के पउधा लगाइन। कार्यक्रम म बहुत अकन पंचायत प्रतिनिधि अऊ बड़ संख्या म ग्रामीन उपस्थित रहिन।