मुठभेड़ स्थल ले भागत हुए  8 नक्सली गेरफ्तार…..

दंतेवाड़ा। जिला के किरंदुल थाना क्षेत्र म हिरोली-दोक्कापारा के जंगल म 29 नवंबर के करीब संझा  6 बजे पुलिस अउ नक्सली मन के बीच मुठभेड़ होइस हे।  जेमा पुलिस ह  8 नक्सली मन ल मुठभेड़ स्थल ले भागत हुए गेरफ्तार कर लिस हे। एखर संग ही मुठभेड़ स्थल ले एक 303 बोर के रायफल,  बम बनाए के सामान अउ कुछु रोजेच उपयोग के सामान घलोक  बरामद  करे गिस हे । घटना के पुष्टि दंतेवाड़ा एसपी अभिषेक पल्लव ह करिस हे।

एसपी पल्लव  ह बताइस के 50 जवान मन के संयुक्त पार्टी किरंदुल थाना क्षेत्र के हिरोली इलाका म नक्सली मन के सूचना  म निकले रहिस  हे। जिहां ए मुठभेड़ होइस हे। 50 जवान मन के टुकड़ी म जिला पुलिस बल, डीआरजी अउ सीआरपीएफ 230 बटालियन के संयुक्त कार्रवाई हवय। संझा 6 बजे ए मुठभेड़ होए के वजह ले जवान घटना स्थल के सर्चिंग पूरी तरह ले  नइ हो पाइस।  उहें नक्सला मन के संख्या 20 ले 25 बताय जात हे ।

एसपी ह कहिन के  दूनों तरफ ले जवान मन ह जबरदस्त घेरा बनाय रहिस हे, जेखर चलत 4 महिला अउ 4 पुरुष नक्सली  ल धर दबोचे म  कामयाबी मिलिस हे। उहें कुछु नक्सली जंगल मन के आड़ लेके भाग निकलिस । गेरफ्तार नक्सली मन के सिनाख्त अभु नइ हो पाए हे।  मगर सबो नक्सली मलांगीर एरिया के होय के  संभावना जताय जात हे ,  काबर के मुठभेड़ स्थल मलांगीर एरिया म आथे।

ए सामान होइस हे बरामद…..एक भरमार, दू तीर बम, एक बम, दू डेटोनेटर, एक स्विच, कॉर्डेक्स वायर, पटाखा एक मोबाइल अउ रोचेज उपयोग के सामग्री घटना स्थल ले बरामद होइस।