मोदी के कारिया झंडा के संग स्वागत करही कांग्रेस कारयकरता मन …पीसीसी कारयकारनी के अहम बइठक म फइसला

रायपुर। बिलासपुर म आज प्रदेस कारयकारनी बइठक म पीएल पुनिया ह बड़ ऐलान करिस हे के 22 सितंबर के जब प्रधानमंत्री जांजगीर दउरा म आही, तब कांग्रेस कारयकरता मन ह मोदी ल कारिया झंडा के संग स्वागत करही। गुरुवार के कांग्रेस के दफ्तर म पीसीसी कारयकारनी के अहम बइठक रखे गिस, जेमा ये फइसला ले गिस हे।
कांग्रेस प्रधानमंत्री के सबो कारयकरम म कारिया झंडा दिखाही। पुनिया के कहिना हे जब तक हमारी मांग पूरी नइ होही ये प्रदरसन जारी रहही। बिलासपुर म लाठीचारज के दोसी अधिकारी मन उपर एफआईआर अउ मामला के न्यायिक जांच के मांग करे गिस हे। ये दउरान पीएल पुनिया ह कारयकरता मन ले कहिन के कांग्रेस के अउ बड़ कारयकारनी होना चाही। येखर सेती ये कारयकारनी म अउ कारयकरता मन ल जोड़े के जरुरत हे। कांग्रेस पार्टी के प्रत्येक कारयकरता मन के सम्मान होही।
आघू उमन कहिन के कांग्रेस के कारयकरता मन कोनो पद म रहे या न रहे, सबो के सम्मान कांग्रेस करही। बिलासपुर के कांग्रेस भवन म लाठीचारज जइसे घटना आज ले पहिली नइ होय रहिस हे। कांग्रेस ये घटना के कड़ा निंदा करत हे। पुनिया ह कहिन के अमर अग्रवाल कचरा के सौकीन हे त काँग्रेसी मन ओला कचरा दिस हे। बइठक म भूपेश बघेल, टीएस सिंहदेव, चरणदास महंत, रविंद्र चौबे समेत कतको कांग्रेसी नेता मवजूद रहिस हे।