मोबाइल फोन ले अश्लील वीडियो लइका मन ल दिखात रहिस हे ड्राइवर

धमतरी। जिला के गट्टा सिल्ली म मीडिल स्कूल के प्रधान पाठक के ड्राइवर उपर छात्रामन के अस्लील वीडियो दिखाय के आरोप लगिस हे। आरोप हे के ड्राइवर ह स्कूली छात्रा मन ल मोबाइल फोन म अस्लील वीडियो दिखाके उंखर संग अभद्रता करिस हे। पूरा मामला म सिकायत साला विकास समिति अउ सरपंच के तरफ ले धमतरी के दुगली थाना म करे गिस हे ।
पुलिस ले मिले जानकारी के मुताबिक दुगली के सरकारी स्कूल म आरएन नेवन्द्र प्रधान पाठक के पद म कायरत हे। उंखर ड्राईवर भोजराज साहू घलो रोजाना उंखर संग स्कूल आथे जाथे। स्कूल म सिक्छक कम होय के कारन भोजराज लइका मन ल पढ़ाये के घलो काम करत रहिस हे । ये दउरान भोजराज ह लइका मन ल पढ़ाये के दउरान मोबाइल फोन ले अस्लील वीडियो लइका मन ल दिखात रहिस हे अउ लइका मन ले अपन बर गुटखा घलो मंगवाता रहिस हे।
ड्राइवर के हरकत के जानकारी लइका मन ह अपन पालक मन ल दीस हे। नाराज पालक मन ह शाला विकास समिति अउ सरपंच ले चरचा के बाद पुलिस ले सिकायत करे के फइसला करिन। संगे संग अपन नाराजगी जताय बर स्कूल म ताला घलो जड़ देय गिस हे। पालक मन ह ड्राइवर उपर कड़ा कार्रवाई के मांग करिस हे। धमतरी एसपी केपी चंदेल ह बताइस के मामला म जांच करे जात हे। जांच के बाद कार्रवाई करे जाही।