ये ज सब्द ले घबराय लगे हव ….विधायक रेणु जोगी के किताब “अजीत जोगी की अनकही कहानियां” के विमोचन

रायपुर। छत्तीसगढ़ के पहिली मुख्यमंत्री अजीत जोगी के उपर उंखर पत्नी अउ कांग्रेस के पूरव उप नेता प्रतिपक्छ रेणु जोगी ह किताब लिखे हे । जेखर नाम हे ‘जोगी की अनकही कहानियां’ बता दन के मंगलवार के रेणु जोगी के ये किताब “अजीत जोगी की अनकही कहानियां” के विमोचन सागौन बंगला म करे गिस हे।
रेणु जोगी ह कहिन के आज के दिन मोर बर अविस्मरनीय हे। ये किताब मैं ह बतउर दरसक के तउर म लिखे हव। मोर जोगी के संग 40 साल के अनुभव उपर आधारित हे। येमा जोगी के सबो तरह के अनुभव हे। जोगी ले जुड़े रोचक प्रसंग हे। आघू उमन कहिन के जोगी के संग ज सब्द हमेसा ले जुड़े हे जइसे जाति प्रकरण, जूदेव टेपकांड, जग्गी हत्याकांड, जरसी गाय मामला, झीरम घाटी हमला। येखर संग ही जनता कांग्रेस घलो जुड़ गेहे। मैं ज सब्द ले घबराय लगे हव। ये मउवका म अजीत जोगी ह कहिन के ये किताब रेणु जोगी के 40 साल के अनुभव उपर आधारित हे। जेमा जोगी ले जुड़े तमाम पहलु मन अउ विवाद मन ल समेटे के कोसिस करे गेहे।
दरअसल रेणु जोगी ह ये किताब म अजीत जोगी के संपूरन जीवन के जिक्र समाहित कर देय हे। जेमा उँखर जाति ल लेके दसक मन ले चलत विवाद, झीरम घाटी हत्याकांड ल लेके उंखर उपर लगाय गे आरोप अउ दिलीप सिंह जूदेव व जग्गी हत्याकांड के जिक्र घलो सामिल हे।