रायपुर। छत्तीसगढ़ माध्यमिक शिक्षा मंडल ह ये दफा 10वीं अउ 12वीं बोर्ड के परीक्षा परिणाम एक संघरा घोषित करे के तैयारी करत हे। एती मूल्यांकन कार्य म लापरवाही बरतय्या 272 शिक्षकों मन ल विभाग ह ब्लैक लिस्ट म डाल दे हे।
माध्यमिक शिक्षा मंडल 10वीं अउ 12वीं बोर्ड के परीक्षा परिणाम एक संघरा घोषित करे के तैयारी म जुट गेहे। इही क्रम म आवइया 2 अप्रैल ले मूल्यांकन कार्य शुरू होना हे।
मामला म छत्तीसगढ़ माध्यमिक शिक्षा मंडल के सदस्य संजय जोशी के कहिना हे ये दफा करीब 7 लाख ले भी जादा परिक्षार्थी बोर्ड परीक्षा म शामिल होए हे। दू तारीख ले मुल्यांकन शुरू होवइया है। मूल्यांकन कार्य बर कुल 29 केंद्र स्थापित करे गेहे। जेमा कुल 48 लाख कॉपी के जांच हो ही। जेखर सेती मूल्यांकन कार्य म करीब 5 हजार ले जादा शिक्षक मन लगही।
संजय जोशी के कहिना हे कि पीछू बरस मूल्यांकन कार्य मन म मूल्यांकनकर्ता शिक्षक मन ह गंभीर लापरवाही बरते रिहिन हे। झेखर लजह ले ठीक ले मूल्यांकन कार्य नइ ह पाइस। परीक्षा परिणाम घोषित होए के बाद रिचेकिंग म कई छात्र मन के नंबर म काफी असमानता पाए गिस हे। एखर सेती 272 शिक्षक मन ल विभाग ह लापरवाही बरतने के मामला म ब्लैक लिस्ट कर दिस हे।
बहरहाल, छत्तीसगढ़ माध्यमिक शिक्षा मंडल के ये प्रयास बेहतर तब माने जाही जब 10वीं अउ 12वीं बोर्ड के परिणाम समय म घोषित हो जाएं। परिणाम घोषित करे म विलंब होही तो एखर असर छात्र छात्रा मन के भविष्य म भी पड़ सकत हे।
