रायपुर। छत्तीसगढ़ म सरकार जिहां योजना मन के जानकारी दे बर जनता के बीच जावत हे। ओती कांग्रेस ह सरकार ल घेरे बर कोनो मौउका नइ छोड़त हे। कांग्रेस के प्रतिनिधि मंडल ह दिल्ली म भारत निर्वाचन आयोग ल छत्तीसगढ़ म लाभ के पद पर पदस्थ विधायक के शिकायत करिस हे।
शैलेश नितिन त्रिवेदी ह कहिस कि कांग्रेस के प्रतिनिधिमंडल ह राज्यसभा चुनाव के मद्देनजर 11 संसदीय सचिव मन सहित लाभ के पद पर पदस्थ बीजेपी के 18 विधायक मन ल बर्खास्त करे बर ज्ञापन दिस हे। आप मन ल बता दन कि, कांग्रेस के ये दांव राज्यसभा चुनाव म उँखर बर संजीवनी के काम कर सकत हे। अगर निर्वाचन आयोग कांग्रेस के शिकायत म बीजेपी के 18 विधायक ल बर्खास्त कर देत हे तव एखर फायदा सीधे तौर म कांग्रेस उम्मीदवार ल मिलही। ।
कांग्रेस के प्रतिनिधिमंडल म छत्तीसगढ़ प्रभारी पीएल पुनिया, प्रदेश कांग्रेस अध्यक्ष भूपेश बघेल, नेता विपक्ष टीएस सिंहदेव, उपनेता विपक्ष कवासी लखमा, राज्यसभा सदस्य छाया वर्मा समेत कई पदाधिकारी मौजूद रिहिस हे।
