रमन सिंह ह ध्यानाकर्षण म उठाइस पुलिस हिरासत म युवक के मौत के मामला, गृहमंत्री ह कहिन-जांच रिपोर्ट आए म होही कार्रवाई
जय जोहार रायपुर…. आज सदन म पूर्व मुख्यमंत्री डॉ. रमन सिंह ह सिलतरा चौकी म पुलिस के हिरासत म एक युवक के मौत के मामला ल ध्यानाकर्षण के माध्यम ले उठाइस। पूर्व मुख्यमंत्री ह आरोप लगाइस कि प्रदेश म लॉ एंड आर्डर के स्थिति बेहद खराब हो चुकिस। अपराधियों के हौसला बुलंद हे अऊ पुलिस मनमानी करत हे। एखर जवाब देते हुए गृहमंत्री ताम्रध्वज साहू ह कहिन कि मामला के न्यायिक जांच करे जात हे। पोर्स्टमार्टम म युवक के मौत शरीर म लगिस चोट के वजह ल बताए गे हे। तीन आरोपी मन ल गिरफ्तार कर ले गे हे।
पूर्व मुख्यमंत्री डॉ. रमन सिंह ह कहिन कि पुलिस अभिरक्षा म लगातार मौत होवत हे। पांच महीना के अंदर पुलिस अभिरक्षा म सात लोग मन के मौत हो गे हे। रमन सिंह ह पोस्टमार्टम के विस्तृत जानकारी ल मांगिस। वो हा कहिन कि पिटाई के चलत ब्रेन हेमरेज होइस अऊ ओखर चलत युवक के मौत होइस।
वो हा थाना म युवक के संग मारपीट करइया पुलिस कर्मचारी मन अऊ अस्पताल के डाक्टरों के खिलाफ कार्यवाही के मांग करिस। जवाब म गृहमंत्री ह कहिन कि ये मामला के न्यायिक जांच चलत हे, इसलिए वे ये बारे म कुछु ज्यादा नई केहे पाही। जांच रिपोर्ट आए के बाद दोषियों के खिलाफ कड़ी ले कड़ी कार्रवाई करे जाही।
