कवर्धा। जिला म 10 वर्षीय बच्ची के संग होय दुष्कर्म के बाद सुकरवार के राज्य महिला आयोग के अध्यक्ष हर्षिता पांडेय पीड़ित बच्ची के घर खैलटुकरी कुंडा जाके उनके परिजन मन ले मुलाकात करिस हे । उमन कहिन कि ये मामला म पुलिस ह तत्काल कार्रवाई करत हुए आरोपी ल गिरफ्तार कर ले हे। आज ओला कोरट म पेशकर रिमांड म लेय के कार्यवाही कतरे जाही । बच्ची मन अउ महिला मन के संग अइसे घिनौना अपराध करइया मन ल फांसी देय जाय के मांग हमन पहिली ले कर रखे हन। समाज अइसे अपराध दिल ल दहला देने वाला हे। महिला आयोग हर कदम म अइसे लोगन के संग खड़े हे। पीड़ित मन ल हर संभव सहयोग करे जाही। बच्ची मन ल अइसे घटना मन ल बचाए बर उमन ल गुड टच अउ बेड टच के बारे म जानकारी दे जात हे। ये जानकारी मन ल व्यापक रुप म प्रचारित व प्रसारित करे जाही। हर्षिता पांडेय के संग पंडरिया विधायक मोतीराम चंद्रवंशी, जनपद अध्यक्ष ज्योति चंद्राकर घलो मउजूद रहिन हे।
कांग्रेस पार्टी के अंतर्कलह एक बार फेर सतह:भाजपा
रायपुर। भाजपा प्रदेश प्रवक्ता संजय श्रीवास्तव कहिन कि कांग्रेस पार्टी म गुटबाजी अपन चरम म हे। येखर जाजा उदाहरण एससी, एसटी नेता मन के संग होए अपमान ले अउ साफ हो गेहे। कांग्रेस पार्टी म गुटबाजी अतका बढ़ गेहे कि अनुसूचित जाति वर्ग ल बोलन नइ दे जाय। संजय श्रीवास्तव ह कहा कि कांग्रेस प्रदेश अध्यक्ष भूपेश बघेल कांग्रेस पार्टी ल एकजुट नइ कर पात हे उहें पुनिया जी घलो हवा हवाई नेतृत्व करिया नेता हे । अब जब विधानसभा चुनाव म भाजपा ल जीत मिलही तो इमन ह ई वी एम मसीन ल कोसही । जबकि असल म इखर हार के जुम्मेदार कांग्रेस पार्टी के गुटबाजी होही। भाजपा प्रवक्ता ह कहिन कि भाजपा के पास सक्षम नेतृत्व अउ पार्टी के एकजुट शक्ति ह चौथी बार सरकार लाए के ब्रह्मास्त्र होही ।
अपन 8 सूत्रीय मांग ल लेके जूनियर डॉक्टर मन हड़ताल म
प्रदेस के अंबेडकर अस्पताल के जूनियर डॉक्टर मन अपन 8 सूत्रीय मांग ल लेके हड़ताल म चले गए हें… डॉक्टर मन के हड़ताल म जाए ले स्वास्थ्य सेवा उपर बुरा असर पड़त हे… आप मन ल बता दन प्रदेस के सबले बड़े सरकारी अस्पताल के जूनियर डॉक्टर मन चिकित्सक मन के खिलाफ मारपीट करे उपर कड़ा कार्रवाई, सुरक्षा गार्ड के तैनाती, मरीज मन के संग रहइया परीजन मन के संख्या निर्धारित करे समेत कई मांग ल लेके हड़ताल करत हें। हड़ताल म 200 ले ज्यादा जूनियर डॉक्टर सामिल हें।
