स्पोरर्ट्स कॉम्पलेक्स म रविवार के शाम 7 बजे होही हनुमान चालीसा के पाठ
रायपुर। रामनवमी म 25 मार्च के बूढ़ापारा के स्पोरर्ट्स कॉम्पलेक्स म सामूहिक हनुमान चालीसा के पाठ करे जाही। एमा करीब 20 हजार लोगन शामिल होही। श्री हनुमान महापाठ समिति के अध्यक्ष सुरेश गोयल ह शनिवार के प्रेस क्लब म पत्रकारवार्ता के दउरान करयकरम के विस्तार ले जानकारी दीस। ओ हर बताइस कि कारयकरम के दउरान मैदान म पहुंचइया सबो लोगन मन के स्वागत तिलक लगाके करे जाही। उमन ल हनुमान चालीसा की प्रति अउ प्रसाद दे जाही। कारय करम के शुरुआत शाम 5:30 बजे ले मुंबई के मशहूर भजन गायिका कंचन किरण मिश्रा के भजन मन के संग होही। शाम 7 बजे सामूहिक हनुमान चालीसा पाठ होही।
रविवि के कुलपति के दउड़ म शैलेष सराफ व अरुणा पल्टा सबले आगू
पं. रविशंकर शुक्ल यूनिवर्सिटी के नवा कुलपति के नाम मन के पैनल म छह नाम शामिल हे । जेमा फॉर्मेसी विभाग के एचओडी शैलेष सराफ अउ नवीन कन्या कॉलेज के प्रींसिपल डॉ. अरुणा पल्टा के नाम सबले आगू चलत हे। सूत्र मन के अनुसार शैलेष सराफ के नाम म अंतिम मुहर लगाए बर आरएसएस के ओर ले सिफारिश करे जात हे। सराफ के दादा अउ पिता दूनों ह राष्ट्रीय स्वयंसेवक संघ ले जुड़े रिहिस हे। एती डॉ. अरुणा पल्टा के नाम ल मुख्यमंत्री के एकदम करीबी पूर्व मुख्य सचिव और रेरा के अध्यक्ष विवेक ढ़ांड आगू बढ़ावत हे।
लाईट्स ऑफ होप फाउंडेशन के सदस्य मन ह दीस हेलमेट पहिने के प्रेरणा
लाईट्स ऑफ होप फाउंडेशन के सदस्यमन ह फाउंडेशन के प्रथम वर्षगांठ म राजधानी के शहीद भगत सिंह चौक म हेलमेट पहिन के वाहन चलाइया मन ल गुलाब के फूल देके प्रोत्साहित करिस हे। एखर संग हेलमेट नइ पहिनइया म ल वाहन चलाये के बेरा म हेलमेट पहिने बर तख्ति मन अउ पोस्टर के माध्यम ले प्रेरित करिस हे। संस्था के अध्यक्ष प्रखर साहू ह बताइस कि हेलमेट हमार जीवन के सच्चा मित्र हे, जे ह हर दुर्घटना ले हमम ल अउ हमार परिवार ल बचाथे । फाउंडेशन के पहिली वर्षगांठ म संस्था के सदस्य मन ह केक काटिस हे।
आयुर्वेदिक कॉलेज के प्रभारी प्राचार्य के खिलाफ महिला आयोग म शिकायत दरज
छत्तीसगढ़ के राजधानी म शासकीय आयुर्वेदिक कॉलेज के प्रभारी प्राचार्य डॉ. जी. आर. चतुर्वेदी के खिलाफ कॉलेज के कुछु महिला प्रोफेसर मन ह दुर्व्यवहार के आरोप लगाइस हे । मामला म बीते शुक्रवार के कॉलेज के कुछु महिला प्रोफेसर मन ह अपन संग होय दुर्व्यवहार के शिकायत राज्य महिला आयोग म करिस हे। ये मामला म शुक्रवार के आयोग ह सुनवाई करिस, जेमा पीड़ितामन ह लिखित म शिकायत दीस हे। महिला मन ह शिकायत म लिखे हे कि शासकीय आयुर्वेदिक कॉलेज के प्रभारी प्राचार्य डॉ. जी. आर. चतुर्वेदी महिला प्रोफेसर के संग अक्सर अश्लील गाली गलौज करत रहिथे। लिहाजा, प्रोफेसर के शिकायत म राज्य महिला आयोग के चार सदस्यीय टीम के गठन कर जांच के जुम्मेदारी सौंपने के बात कहीस हे। मामला म जानकारी देवत हुए राज्य महिला आयोग के अध्यक्ष डॉ. हर्षिता पांडेय ह कहिस कि फिलहाल मामला म कार्रवाई करत हुए विभाग ह शासकीय आयुर्वेदिक कॉलेज के प्रभारी प्राचार्य डॉ. जी. आर. चतुर्वेदी ल सस्पेंड कर दिस हे।
