रायपुर। छत्तीसगढ़ म होवय्या विधानसभा चुनाव ल लेके प्रदेश कांग्रेस अध्यक्ष भूपेश बघेल अउ नेता प्रतिपक्ष टीएस सिंहदेव ह आज दिल्ली म कांग्रेस अध्यक्ष राहुल गांधी ले मुलाकात कर चरचा करिस। प्रदेश कांग्रेस के महामंत्री अउ संचार विभाग के अध्यक्ष शैलेश नितिन त्रिवेदी ह बताइन कि ये मुलाकात म 2018 नवंबर म होवय्या छत्तीसगढ़ विधानसभा चुनाव के तैयारी मन ल लेके विस्तार ले चरचा करे गिस। भाजपा सरकार के कुशासन ल राज्य ले उखाड़ फेंके बर राहुल गांधी ह कतको टिप्स दिस हे। उमन ह बताइन कि कांग्रेस के रोडमैप तैयार हे, जेखर तहत सबो 90 विधानसभा म संकल्प शिविर आयोजित करे जात हे। 11 संकल्प शिविर मन के बाद प्रोजेक्ट शक्ति के शुरुआत के जानकारी घलो राहुल गांधी ल देय गिस हे। आवय्या दिन म राहुल गांधी के छत्तीसगढ़ दउरा घलो प्रस्तावित हे।
स्कूली छात्रा अऊ महिला मन नसा मुक्ति अभियान चलाइन
बलौदाबाजार जिला म स्कूली छात्रा अऊ महिला मन नसा मुक्ति अभियान चलाइन। एकर बर क्षेत्र के स्कूली छात्रा मन नशा के खिलाफ जागरूकता रैली निकालिन। अऊ नशे के व्यापार करत लोगन मन ल चेतावनी दिन। अतका ही नइ ये नसा मुक्त रैली म महिला मन ल पुलिस अऊ क्षेत्र के युवा मन के घलो सहयोग मिलिस। पुलिस ह साफ कर दिस कि अगर अबैध नशा कारोबारी मन नइ सुधरही त ओमन उपर सख्त कार्रवाई करे जाही।
अम्बेडकर अस्पताल म डॉक्टर मन ओला झाड़-फूंक करवाए के सलाह दिन
कांकेर के तलाकुर्रा म एक 16 बछर के छात्र झमित कुमार के तबीयत अचानक बिगड़िस अऊ ओकर आवाज चले गिस। आप मन ल बता दन कि जब परिजन मन छात्र ल इलाज बर अम्बेडकर अस्पताल लेके पहुचिन त समस्या के पता नइ चले के कारन डॉक्टर मन ओला झाड़-फूंक करवाए के सलाह दिन। उहें अब परीजन मन आर्थिक मदद बर कलेक्टर ले गुहार लगाए हे।
देश के सॉफ्टबॉल टीम म जगह बना लिन अरुणा अऊ सुनीता
बीजापुर के गंगालूर इलाका के दू बेटी अरुणा अऊ सुनीता अब अपन प्रतिभा के बदौलत अंतर्राष्ट्रीय स्तर म देस के परचम लहराए जात हे। आप मन ल बता दन कि पीएम मोदी 14 अप्रैल के अपन छत्तीसगढ़ प्रवास के दउरान ये दून्नों बेटी मन ले मिलके हौसला अफजाई घलो करही। कभु महुआ अऊ तेंदुपत्ता बेचके अपन जीवन यापन करइया अरुणा अऊ सुनीता ह महज़ 1 साल के प्रैक्टिस म ही देश के सॉफ्टबॉल टीम म अपन बर जगह बना लिन।
No Comment! Be the first one.