वरिष्ठ पत्रकार पंडित श्यामलाल चतुर्वेदी के होइस सम्मान

रायपुर। बिलासपुर जिला म प्रदेश के मुख्यमंत्री बीते सोमवार के जिला के एक दिवसीय प्रवास म पहुंचिस। ए बखत मुख्यमंत्री रमन सिंह ह पत्रकार मन बर बने प्रेस क्लब के नवा भवन के लोकार्पण करिस हे। ये ह जिलाके पत्रकार साथी मन बर सोमवार के दिन बेहद ही खास रहिस हे।
अपन पहिले ले निर्धारित कार्यक्रम के तहत मुख्यमंत्री डॉ. सिंह ह शाम 6 बजे बिलासपुर प्रेस क्लब पहुंच के नवा प्रेस क्लब भवन के पूरा विधि विधान ले उद्घाटन करिस । वरिष्ठ पत्रकार पंडित श्याम लाल चतुर्वेदी ल साल अउ श्रीफल भेंट करके उंखर सम्मान करिस। एखरे संग उम्मन के किताब के विमोचन घलो करिस। इही बीच म रमन सिंह ह अपन लोक सुराज अभियान के बात करत हुए कहिन कि ये अभियान राष्ट्रीय स्तर म एक सोशल ऑडिटिंग के तरह हवय, जो अपन आप म एक मिसाल से कम नइए।
नवा प्रेस क्लब भवन के उद्घाटन ले पहिली मुख्यमंत्री ह लोक सुराज अभियान अउ विभिन्न विकास कार्य मन के समीक्षा बैइठक लीस। मुख्यमंत्री ह पत्रकार मन ले चरता करत हुए प्रदेश के पूर्व मुख्यमंत्री अजीत जोगी पर जमके ताना मारत कहिन कि वो ह जिहां ले चाहे चुनाव लड़ सकत हे, हम उंखर स्वागत करत हन। लेकिन जोगी अपन बात म कभी कायम नइ रिहिस हे। बहरहाल, मुख्यमंत्री ह कहिन कि लोगन मन ले जुड़े के मोर अभियान आगु भी लगातार जारी रहही। एखर संग सीएम ह आगामी 200 दिन तक के अपन कार्य योजना ल तैयार कर डारे हे। इहीं दौरान सीएम ह दिल्ली के मुख्यमंत्री अरविंद केजरीवाल के बयान म पलटवार करत हुए मजाकिया अंदाज म कहिन कि उंखर गोद बहुत बड़े हवय, न जाने कौउन-कौउन मन गोद म समाए के कोशिश करत हवय। एती बर बिलासपुर के बेटी निधि के अमेरिका ले वापस आए के प्रश्न म सीएम ह कहिन कि हमार विदेश मंत्री ये मामला म बेहद संवेदनशील हवय। एखर अलावा धरमलाल कौशिक के राज्य सभा के पत्ता कटे बर मुख्यमंत्री ह कहिन कि कोनो भी महत्वपूर्ण निर्णय पार्टी के शीर्ष नेतृत्व लेवत हे। अउ हम्मन उंखर स्वागत करत हन।