विकास के लंबी छलांग लगाय के काम भारतीय जनता पारटी ह करिस : रमन

महासमुंद। गुरुवार के खल्लारी विधानसभा के क्षेत्र कोमाखान म सीएम डा. रमन सिंह के सभा आयोजित रहिस हे। डा. रमन ह खल्लारी विधानसभा ले जोगी पारटी ले चुनाव लड़इया परेश बागबाहरा उपर प्रहार करत हुए कहिन के परेश के त कोनो छाप नइए, अइसे व्यक्ति दूसर मन के का भला करही?
सभा ल संबोधित करते हुए डा. रमन ह कहिन के विकास के लंबी छलांग लगाय के काम भारतीय जनता पारटी ह करिस हे। उमन भाजपा प्रत्यासी मोनिका साहू के पक्ष म वोट करे के अपील करिन। उमन राज्य म सरकार बनाय ल लेके फेर एक बार कहिन के हमार पारटी 65 प्लस चुनाव जीतके सरकार बनावत हे। पहिली चरन म होय मतदान ल लेके कहिन के 18 म ले 14 सीट हमन जीतके आवत हन। डा. रमन खल्लारी के जीत बर घलो आस्वस्त दिखिस। उमन कहिन के हमन गरीब मन ल चावल देय के योजना 2007 ले सुरू करेन। अब कांग्रेस ल लगत हे के चावल देय ले घलो चुनाव जीते जा सकत हे, लेकिन आपमनल बता दव के चावल देय ले कोनो चुनाव नइ जीत सकय। हमन त गरीबमन बर योजना बनाय हन। छग म अब कोनो भूखा नइ रहत हे, जब बच्चा भूखा सोथे तव मां ल घलो नींद नइ आवय।