सपथ ग्रहन के पहिली दस्तावेज मन ल आखिर काबर जलाए गे हे ?… ए सवाल पूछिस कांग्रेस

रायपुर। पूर्व मंत्री मन अउ आला अफसर मन के बंगला म दस्तावेज मन ल  जलाए जाए के खबर म प्रतिक्रिया देवत हुए प्रदेश कांग्रेस के मुख्य प्रवक्ता सुशील आनंद शुक्ला ह कहिन के  सपथ ग्रहन ले पहिली दस्तावेज मन ल आखिर काबर  जलाए गे हे? एमा आखिर अइसे का हे।

सुशील ह कहिन के दस्तावेज अगर जरूरी नइ रहिन हे त  ओला नष्ट करे के  काम आवइया सरकार करतिस। एखर निरनय जावइया लोगन कइसे कर सकत हे। ए मामला म जे तरह ले जल्दबाजी ले अनुपयोगी कहि के  दस्तावेज मन ल  जलाए जात हे. ओखर ले स्पष्ट होवत हे के दाल म कुछु न कुछु कारिया हे। सरकार बदलत ही दस्तावेज मन ल जलाए के हड़बड़ाहट काबर?  ए दस्तावेज मन म अइसे का हे, जेला  जलाए म मंत्री अउ अधिकारी जुटे हवय।

भाजपा के मंत्री मन उपर आरोप लगात हुए सुशील ह कहिन के  ए तरह के हरकत करइया लोग समझ लें, राज्य म भ्रष्ट भारतीय जनता पार्टी के सरकार के बिदाई हो चुके हे।  आवइया कांग्रेस के सरकार बदला के भावना ले कोनो काम नइ करय।  लेकिन जे लोगन दोषी होही उमन बच घलो नई पाही। छत्तीसगढ़ के कांग्रेस सरकार भ्रष्टाचारी मन उपर अंकुश लगाए म प्रतिबद्ध हे।  छत्तीसगढ़ के जनता के हित मन म सालों ले डाका डालइ लोगन  कतना कोसिस कर लें, कानून के दायरा ले बच नइ पाए। अइसन लोगन के  खेलाफ कानून अपन काम जरूर करही।