सीबीआई ल कोरट के फटकार…दूबारा पेस करव चालान….. बघेल ह सरकार उपर दोश मढ़िस

रायपुर। कथित सेक्स सीडी कांड म सोमवार सीबीआई ह आधा-अधूरा तइयारी मन ले चालान पेस करिन, जेखर ले कोरट ह अस्वीकार कर दिस हे। येखर बाद अब सीबीआई दूबारा दुपहर 3 बजे कोरट म चालान पेस करही। कोरट म पीसीसी चीफ भूपेश बघेल ल हाजिर होय बर कहे रहिस हे। बघेल ह सीबीआई के ये कार्रवाई ल दबाव म करे गेहे कहिस।
दरअसल, कथित सेक्स सीडी मामला म भूपेश बघेल समेत 5 लोगन ल समन जारी होय हे। सोमवार बिहनिया सीबीआई ह जे चालान पेस करिस ओमा गवाह मन के फोटो नइ होय के संग कतको दस्तावेज मन के कमी रहिस हे। ये मा भूपेश बघेल के कहिना हे के बिलासपुर म कांग्रेस कार्यकर्तामन उपर होय लाठी चारज ल लेके हमन पीएम मोदी ल काला झंडा दिखायेन, येखर ले प्रदेस सरकार बउखला गेहे अउ बदला के भावना ले चालान आज पेस करे के निरदेस दिस हे। येखर कारन दबाव म आके सीबीआई ह रविवार के संझा नोटिस जारी करिस हे। सीबीआई के नोटिस म हम हाजिर होयन हन। लेकिन सीबीआई ह आधा-अधूरा चालान पेस करिस। येखर ले साफ हे के उमन जल्दबाजी म हे अउ ओखर उपर सरकार के दवाब हे।